វិទ្យាស្ថានស្រវជ្រាវអន្តរជាតិ នៅថ្ងៃព្រហស្បតិ៍ (ទី២ ខែវិច្ឆិកា)នេះ បានឲ្យដឹងថា ប្រទេសជិតពាក់កណ្តាលនៃពិភពលោក កំពុងមើលឃើញកម្រិតនូវការធ្លាក់ចុះនៃលទ្ធិប្រជាធិបតេយ្យ ហើយសូម្បីប្រទេសខ្លះ ដែលកាន់លទ្ធិប្រជាធិបតេយ្យយូរអង្វែងជាប្រវត្តិសាស្ត្រមកហើយនោះ ក៏ស្ថិតក្នុងចំណោមប្រទេសទាំងនោះដែរ។

វិទ្យាស្ថានអន្តរជាតិ ដើម្បីលទ្ធិប្រជាធិបតេយ្យ និងជំនួយដល់ការបោះឆ្នោត (International IDEA) ដែលមានមូលដ្ឋាន នៅទីក្រុង Stockholm ប្រទេសស៊ុយអែត បានបង្ហាញថា ប្រទេសចំនួន៨៥ ក្នុងចំណោមប្រទេសចំនួន ១៧៣ ដែលត្រូវបានស្ទង់មតិ «បានកើតមានការធ្លាក់ចុះយ៉ាងហោចណាស់នូវសូចនាករសំខាន់មួយ ក្នុងការអនុវត្តលទ្ធិប្រជាធិបតេយ្យ ក្នុងរយៈពេល ៥ឆ្នាំចុងក្រោយនេះ»។

វិទ្យាស្ថានបានបន្ថែមថា៖ «លទ្ធិប្រជាធិបតេយ្យ ដែលបានបង្កើតឡើងជាច្រើន កំពុងជួបប្រទះនឹងឧបសគ្គនានា រាប់ចាប់ពីការធ្លាក់ចុះនៃសមភាពក្រុមមនុស្សក្នុងសង្គម នៅសហរដ្ឋអាមេរិក សេរីភាពសារព័ត៌មាន នៅប្រទេសអូទ្រីស និងការទទួលបានយុត្តិធម៌ នៅចក្រភពអង់គ្លេស»។

ក្នុងនាមជាអ្នកនិពន្ធម្នាក់នៃរបាយការណ៍ The Global State of Democracy ឆ្នាំ២០២៣ លោក Michael Runey ដែលជាមន្ត្រីកម្មវិធីរបស់វិទ្យាស្ថាន បានប្រាប់សារព័ត៌មានថា៖ «នេះគឺជាឆ្នាំទី៦ ដែលយើងបានឃើញថា ប្រទេសច្រើនឡើងៗ មានការដើរថយក្រោយ ក្នុងការអនុវត្តលទ្ធិប្រជាធិបតេយ្យ ជាជាងធ្វើឲ្យប្រសើរឡើង»។ 

លោកបានបន្ថែមថា និន្នាការរយៈពេល ៦ឆ្នាំនោះ បានបង្ហាញឲ្យឃើញពី «ការធ្លាក់ចុះលទ្ធិប្រជាធិបតេយ្យ» ក្នុងរយៈពេលដ៏យូរបំផុត ដែលវិទ្យាស្ថានបានមើលឃើញ គិតចាប់តាំងពីវិទ្យាស្ថានបានចាប់ផ្តើមប្រមូលទិន្នន័យ ក្នុងឆ្នាំ១៩៧៥៕