ជនបរទេសជាច្រើននាក់បន្ថែមទៀត បានត្រៀមចាកចេញពីតំបន់ហ៊ុមព័ទ្ធហ្កាហ្សា នៅថ្ងៃព្រហស្បតិ៍នេះខណៈរដ្ឋាភិបាលក្រុមហាម៉ាស់ និយាយថា ពលរដ្ឋប៉ាឡេស្ទីន យ៉ាងហោចណាស់១៩៥នាក់បានស្លាប់ក្នុងការវាយប្រហាររបស់អ៊ីស្រាអែល លើជំរំជនភៀសខ្លួន Jabalia ជាការវាយប្រហារដែលអ៊ីស្រាអែល និយាយថា បានសម្លាប់មេបញ្ជាការក្រុមហាម៉ាស់ម្នាក់។ ជនជាតិបរទេសយ៉ាងហោចណាស់ ៣២០នាក់ នៅលើបញ្ជីដំបូង៥០០នាក់ ព្រមទាំងពលរដ្ឋតំបន់ហ្កាហ្សាដែលរងរបួសធ្ងន់រាបសិបនាក់ បានឆ្លងកាត់ចូលមកប្រទេសអេហ្ស៊ីប កាលពីថ្ងៃពុធ ក្រោមកិច្ចព្រមព្រៀង រវាងអ៊ីស្រាអែល អេហ្ស៊ីប និងក្រុមហាម៉ាស់។

អ្នកកាន់លិខិតឆ្លងដែនមកពី ប្រទេសអូស្រាលី អូទ្រីស ប៊ុលហ្គារី សាធារណៈរដ្ឋឆែក ហ្វាំងឡង់ ឥណ្ឌូនេស៊ី អ៊ីតាលី ជប៉ុន ហ្សកដានី ចក្រភពអង់គ្លេស និងសហរដ្ឋអាមេរិក ត្រូវបានជម្លៀសចេញ។ មន្ត្រីតំបន់ហ្កាហ្សានិយាយថា ច្រកឆ្លងកាត់ព្រំដែន Rafah បើកឡើងវិញនៅថ្ងៃព្រហស្បតិ៍នេះ ដូច្នេះជនបរទេសច្រើនបន្ថែមទៀត អាចចាកចេញ។ ប្រភពផ្នែកការទូត បាននិយាយថា អ្នកកាន់លិខិតឆ្លងដែនបរទេសប្រមាណ៧.៥០០នាក់ នឹងចាកចេញពីតំបន់ហ្កាហ្សារយៈពេលប្រហែល២សប្តាហ៍។ 

ដោយបង្កើនការវាយលុកទៅលើក្រុមសកម្មប្រយុទ្ធហាម៉ាស់ អ៊ីស្រាអែល បានទម្លាក់គ្រាប់បែកនៅតំបន់ហ្កាហ្សា តាមដីគោក តាមសមុទ្រ និងតាមអាកាស នៅក្នុងយុទ្ធនាការរបស់ខ្លួន ដើម្បីកម្ទេចក្រុមអ៊ីស្លាមនិយម គាំទ្រដោយអ៊ីរ៉ង់ បន្ទាប់ពីការសម្រុកចូលឆ្លងកាត់ព្រំដែនចូលទៅក្នុងប្រទេសអ៊ីស្រាអែលភាគខាងត្បូង កាលពីថ្ងៃទី៧ ខែតុលា។ 

អឌ្ឍចន្ទក្រហមប៉ាឡេស្ទីន បាននិយាយថា ការផ្ទុះជាច្រើនត្រូវបានលាន់លឺ កាលពីពេលព្រឹកថ្ងៃព្រហស្បតិ៍នេះនៅជុំវិញមន្ទីពេទ្យ Al-Quds ក្នុងទីក្រុងតំបន់ហ្កាហ្សាដែលមានមនុស្សច្រើន។ កាលពីពេលមុន អាជ្ញាធរអ៊ីស្រាអែល បានព្រមានឲ្យអ្នកនៅមន្ទីរពេទ្យជម្លៀសខ្លួនចេញជាបន្ទាន់ ដែលមន្ត្រីអង្គការសហប្រជាជាតិ និយាយថាមិនអាចធ្វើទៅបានទេដោយគ្មានការបង្កគ្រោះថ្នាក់ដល់អ្នកជំងឺនោះ។