ប្រទេសចិន និយាយកាលពីថ្ងៃព្រសហស្បតិ៍ថា កងទ័ពរបស់ខ្លួន ឈរលើការប្រុងប្រយ័ត្នខ្ពស់ជាប្រចាំ បន្ទាប់ពីនាវាចម្បាំងសហរដ្ឋអាមេរិក និងកាណាដាបានឆ្លងកាត់តាមច្រកសមុទ្រតៃវ៉ាន់ ជាការឆ្លងកាត់រួមគ្នាលើកទី២ ក្នុងរយៈពេល២ខែមកនេះ។

កងទ័ពជើងទឹកសហរដ្ឋអាមេរិក បាននិយាយថា នាវា USS Rafael Peralta នាវាពិឃាតArleigh Burke និងនាវា HMCS Ottawa របស់កងទ័ពជើងទឹកភូមិន្ទកាណាដា បានធ្វើការឆ្លងកាត់តាមទម្លាប់នៅច្រកសមុទ្រនេះ កាលពីថ្ងៃពុធ។

អ្នកនាំពាក្យទីបញ្ជាការតំបន់ភាគខាងកើត របស់ប្រទេសចិន លោក Shi Yi បាននិយាយនៅក្នុងសេចក្តីថ្លែងការណ៍ថា កងទ័ពនៅក្នុងតំបន់នេះ ឈរលើការប្រុងប្រយ័ត្នខ្ពស់ជានិច្ច ហើយនឹងការពារដាច់ខាត បូរណភាពជាតិ និងសន្តិសុខព្រមទាំង សន្តិភាពនិងស្ថិរភាពក្នុងតំបន់។

លោក Shi បានរិះគន់យ៉ាងខ្លាំងចំពោះការឆ្លងកាត់ចុងក្រោយនេះ ថាជាការធ្វើជ្រុលហួសជាសាធារណៈ និងបាននិយាយថាកងទ័ពជើងទឹក និងកងកម្លាំងទ័ពអាកាសរបស់ខ្លួន បានតាមដានការឆ្លងកាត់របស់ពួកគេទាំងអស់។

ការឆ្លងកាត់របស់នាវាទាំងនេះ កើតមានឡើង បន្ទាប់ពីនាវាចម្បាំង២គ្រឿង របស់សហរដ្ឋអាមេរិក និងកាណាដា បានបើកឆ្លងកាត់ ផ្លូវទឹកដ៏ចង្អៀត បែងចែកកោះ និងចិនដីគោកកាលពីថ្ងៃទី៩ ខែកញ្ញា។

សហរដ្ឋអាមេរិក និងសម្ព័ន្ធមិត្តលោកខាងលិចរបស់ខ្លួន បានបង្កើនសេរីភាពនាវាចរណ៍ ឆ្លងកាត់ដោយនាវាកងទ័ពជើងទឹក ទាំងច្រកសមុទ្រតៃវ៉ាន់ និងសមុទ្រចិនខាងត្បូងដែលមានជម្លោះដើម្បីធ្វើឲ្យរឹងមាំ ខណៈផ្លូវទាំងពីរនេះ ជាផ្លូវទឹកអន្តរជាតិ ដែលធ្វើឲ្យទីក្រុងប៉េកាំង មានកំហឹង។