ឧត្តមសេនីយ៍ជាន់ខ្ពស់របស់អ៊ុយក្រែន បានព្រមានថា នឹងមិនមាន «ការទម្លាយភាពទាល់ច្រក»ភ្លាមៗ នៅក្នុងការវាយបកប្រឆាំងនឹងរុស្ស៊ី ដែលជាការអត្ថាធិប្បាយ ដែលនឹងបង្កើតការព្រួយបារម្មណ៍សម្រាប់លោក Joe Biden នៅពេលលោកព្យាយាមតតាំងដើម្បីធានាថា សហរដ្ឋអាមេរិករក្សាបានមូលនិធិរបស់ខ្លួនសម្រាប់ទីក្រុងគីវ។

នៅក្នុងការវាយតម្លៃយ៉ាងម៉ឺងម៉ាត់ក្នុងរយៈពេល១៨ខែ បន្ទាប់ពីលោក Vladimir Putin បានចាប់ផ្តើមការឈ្លានពានរបស់ខ្លួន លោកឧត្តមសេនីយ៍អ៊ុយក្រែន Valery Zaluzhny បាននិយាយថា  ភាគីទាំងពីរ បានឈានដល់ការជាប់គាំងមួយប្រកបដោយប្រសិទ្ធភាព។

រយៈពេល៥ខែក្រោយមកនេះ ដោយមានការគាំទ្រអាវុធនិងវិធីសាស្ត្ររបស់អង្គការណាតូ កងកម្លាំងអ៊ុយក្រែន បានស្វែងរកបណ្តេញកងកម្លាំងរុស្ស៊ីមកវិញ ដោយកងទ័ពរបស់លោកឧត្តមសេនីយ៍ បានគ្រប់គ្រងបានត្រឹមតែ១០ម៉ាយប៉ុណ្ណោះ។

លោកឧត្តមសេនីយ៍ បានថ្លែងប្រាប់សារព័ត៌មាន The Economist ថា៖«ដូចនៅក្នុងសង្គ្រាមលោកលើកទី១ដែរ យើងបានឈានដល់កម្រិតនៃបច្ចេកវិទ្យា ដែលធ្វើឲ្យយើងឈានដល់ដំណាក់កាលជាប់គាំង» ។

លោក បាននិយាយថា វានឹងទាមទារការរីកចម្រើនផ្នែកបច្ចេកវិទ្យាដ៏ធំមួយ ដើម្បីទម្លាយភាពជាប់គាំង ហើយទំនងជានឹងមិនមានទម្លាយការទាល់ច្រកណាមួយឲ្យបានទូលំទូលាយ និងល្អប្រសើរទេ។