ភ្នំពេញ៖ សម្តេចតេជោហ៊ុន សែននាយករដ្ឋមន្ត្រីកម្ពុជា តាមរយៈគណៈកម្មការចំពោះកិច្ចការចាក់វ៉ាក់សាំងកូវីដ-19 ក្នុងក្របខណ្ឌទូទាំងប្រទេស នៅថ្ងៃទី០៨ ខែមិថុនានេះ បន្តផ្តល់អំណោយថេបប្លេត និងសម្ភារៈវេជ្ជសាស្ត្រមួយចំនួនទៀត ជូនដល់ក្រុមគ្រូពេទ្យចាក់វ៉ាក់សាំងបង្ការជំងឺកូវីដ-19 ក្នុងរាជធានី-ខេត្តចំនួន៥។
គណៈកម្មការចំពោះកិច្ចការចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេស នៅថ្ងៃទី០៨ខែមិថុនានេះ បានប្រគល់ថេបប្លេត ជាអំណោយរបស់សម្តេចតេជោហ៊ុន សែននាយករដ្ឋមន្ត្រីកម្ពុជា និងសម្ភារៈវេជ្ជសាស្ត្រមួយចំនួនទៀត ជូនដល់ក្រុមគ្រូពេទ្យចាក់វ៉ាក់សាំង ក្នុងខេត្តចំនួន៥រួមមាន៖ ខេត្តពោធិ៍សាត់ កំពង់ឆ្នាំង បាត់ដំបង បន្ទាយមានជ័យ និងខេត្តប៉ៃលិន។
ពិធីប្រគល់-ទទួលអំណោយទាំងអស់នេះ ធ្វើឡើងនៅសាលាខេត្តពោធិ៍សាត់ ដែលមានការអញ្ជើញចូលរួមពីលោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចការចាក់វ៉ាក់សាំងកូវីដ-19 ក្នុងក្របខណ្ឌទូទាំងប្រទេស លោកស្រីជំទាវវេជ្ជបណ្ឌិតលី អាយលែនតំណាងអង្គការសុខភាពពិភពលោកប្រចាំកម្ពុជា ឯកឧត្តមម៉ៅ ធនិនអភិបាលខេត្តពោធិ៍សាត់ និងតំណាងមន្ទីរសុខាភិបាលនៅខេត្តទាំង៥ផងដែរ។
នៅក្នុងឱកាសនោះ លោកជំទាវឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគ.វ.ក.១៩ បានមានប្រសាសន៍ថា «ក្រោមការគិតគូរ និងយកចិត្ដទុកដាក់របស់សម្ដេចតេជោ ដំណើរការចាក់វ៉ាក់សាំងនៅកម្ពុជា មានវឌ្ឍនភាពគួរជាទីមោទកភាព ដែលធ្វើឡើងតាមលំដាប់លំដោយ ហើយសំភារៈទាំងអស់នេះ នឹងផ្តល់ភាពងាយស្រួលដល់ដំណើរការចាក់វ៉ាក់សាំងរបស់ក្រុមគ្រូពេទ្យ។
សម្រាប់សម្ភារដែលសម្តេចតេជោហ៊ុន សែននាយករដ្ឋមន្ត្រីកម្ពុជា ផ្តល់ជូនដល់ក្រុមគ្រូពេទ្យចាក់វ៉ាក់សាំងក្នុងខេត្តចំនួន៥ មានសម្ភារៈដូចជា៖ ឡេបថប (Labtop), ម៉ាស៊ីនព្រីន, ម៉ាស, សំលៀកបំពាក់សុវត្ថិភាពរបស់គ្រូពេទ្យ, របាំងមុខ, ស្រោមជើង ស្រោមដៃ, ម៉ាស៊ីនវ៉ាស់កម្ដៅ, និងម៉ាស៊ីនសម្ពាធឈាមជាដើម។
បើតាមឯកឧត្តម ម៉ៅ ធនិន អភិបាលខេត្តពោធិ៍សាត់ មានប្រសាសន៍ដែរថា សម្ភារៈដែលទទួលបានពីសម្តេចតេជោនៅពេលនេះ ក្រុមគ្រូចាក់វ៉ាក់សាំងនៅក្នុងខេត្ត នឹងយកទៅប្រើប្រាស់ឳ្យចំគោលដៅ។ ក្រៅពីនេះឯកឧត្តមបានបង្ហាញពីវិធានការទប់ស្កាត់ការឆ្លងជំងឺកូវីដ_១៩ របស់រដ្ឋបាលខេត្តផងដែរ។
ការចាក់វ៉ាក់សាំងកូវីដ-19 គឺជាមធ្យោបាយមួយ ក្នុងចំណោមវិធានការសុខាភិបាលចាំបាច់ដទៃទៀត ដែលនឹងបង្ការការរាតត្បាត ការចម្លងជំងឺកូវីដ-19 និងកាត់បន្ថយផលប៉ះពាល់នៃជំងឺកូវីដ-19 ទៅលើវិស័យសេដ្ឋកិច្ច និងសង្គម៕ អត្ថបទ៖ ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
