ក្រុមមន្ត្រី នៅថ្ងៃព្រហស្បតិ៍ (ទី២ ខែវិច្ឆិកា) នេះ បាននិយាយថា ប្រជាជនអាហ្វហ្គានីស្ថានជាង ១៦៥.០០០នាក់ បានភៀសខ្លួនចេញពីប្រទេសប៉ាគីស្ថាន នៅក្នុងខែដែលបន្ទាប់ពីទីក្រុងអ៊ីស្លាម៉ាបាដ បានចេញឱសានវាទដល់មនុស្ស ១,៧លាននាក់ឲ្យចាកចេញ បើពុំដូច្នោះទេប្រឈមនឹងការចាប់ខ្លួន និងការនិរទេស។

មនុស្សភាគច្រើនបានប្រញាប់ប្រញាល់ទៅកាន់ព្រំដែន ក្នុងរយៈពេលប៉ុន្មានថ្ងៃកន្លងមកនេះ ខណៈដែលថ្ងៃផុតកំណត់ បានខិតជិតមកដល់ ហើយនគរបាលបានចាប់ផ្តើមបើកមជ្ឈមណ្ឌលឃុំខ្លួនជាច្រើនកន្លែង ដើម្បីឃុំខ្លួនជនជាតិអាហ្វហ្គានីស្ថាន ដែលត្រូវបានចាប់ខ្លួន។

មន្ត្រីនៅឯច្រកព្រំដែនដ៏មមាញឹកបំផុតរបស់ប្រទេស នៅទីក្រុង Torkham ក្នុងខេត្ត Khyber Pakhtunkhwa បានងើបធ្វើការតាំងពីព្រឹកព្រលឹមថ្ងៃព្រហស្បតិ៍ ដើម្បីចាត់ចែងឲ្យរួចរាល់មនុស្សចំនួន ២៨.០០០នាក់ ដែលឈរជាជួរចម្ងាយ ៧គីឡូម៉ែត្រ។ ចំណែកអាជ្ញាធរ នៅខាងព្រំដែនអាហ្វហ្គានីស្ថាន ត្រូវប្រឹងជម្នះនឹងទំហំនៃចំនួនដ៏ច្រើននេះ ខណៈដែលពួកគេព្យាយាមដោះស្រាយជាមួយអ្នកដែលវិលត្រឡប់មកកាន់មាតុប្រទេសវិញ ដោយអ្នកខ្លះ ទើបបានឈានជើងជាន់ដែនដីអាហ្វហ្គានីស្ថានជាលើកដំបូង ក្នុងឆាកជីវិតរបស់ពួកគេ។

សូមបញ្ជាក់ថា ពលរដ្ឋអាហ្វហ្គានីស្ថានរាប់លាននាក់ បានធ្វើដំណើរចូលទៅក្នុងប្រទេសប៉ាគីស្ថាន នៅន្មានទសវត្សរ៍ថ្មីៗនេះ ដោយបានភៀសខ្លួនចេញពីជម្លោះហិង្សា ដែលកើតមានជាបន្តបន្ទាប់ ក្នុងនោះរួមទាំងចំនួន ដែលត្រូវប៉ាន់ប្រមាណ ៦០០.០០០នាក់ផងដែរ គិតចាប់តាំងពីរដ្ឋាភិបាលតាលីបង់ បានដណ្តើមអំណាច ក្នុងខែសីហា ឆ្នាំ២០២១ និងបានដាក់ចេញនូវច្បាប់អ៊ីស្លាមយ៉ាងតឹងរ៉ឹងរបស់ខ្លួន។

ប៉ាគីស្ថានបានឲ្យដឹងថា ផែនការការនិរទេសនេះ គឺដើម្បីការពារ «សុខុមាលភាព និងសន្តិសុខ» របស់ខ្លួន បន្ទាប់ពីមានការវាយប្រហារកើនឡើងយ៉ាងខ្លាំងក្លា ដោយរដ្ឋាភិបាល បានបន្ទោសទៅលើក្រុមសកម្មប្រយុទ្ធ ដែលកំពុងប្រតិបត្តិការពីប្រទេសអាហ្វហ្គានីស្ថាន៕