នៅក្នុងសម័យប្រជុំមហាសន្និបាតអង្គការសហប្រជាជាតិ កាលពីថ្ងៃពុធ ប្រេសិតរបស់ប្រទេសចិន បាននិយាយថា ជាថ្មីម្ដងទៀត ប្រទេសចិនបានជំរុញឲ្យសហរដ្ឋអាមេរិកលុបចោលជាបន្ទាន់នូវទណ្ឌកម្ម និងបម្រាមប្រឆាំងនឹងប្រទេសគុយបា ហើយបានថ្កោលទោសសហរដ្ឋអាមេរិក ដែលបានបង្កឲ្យមានខាតបង់គ្រប់យ៉ាងដល់ប្រទេស នៅតំបន់ការ៉ាអ៊ីព។

លោក Dai Bing តំណាងអចិន្ត្រៃយ៍រងរបស់ប្រទេសចិនប្រចាំអង្គការសហប្រជាជាតិ បាននិយាយថា ការដាក់ទណ្ឌកម្ម និងបម្រាមលើប្រទេសគុយបា អស់រយៈពេលជាង ៦០ឆ្នាំ បានបណ្តាលឲ្យមានការខាតបង់ជិត ១៦០ពាន់លានដុល្លារអាមេរិក និងបង្កឲ្យមានវិបត្តិមនុស្សធម៌ធ្ងន់ធ្ងរ។ គិតចាប់ពីខែមីនា ឆ្នាំ២០២២ ដល់ខែកុម្ភៈ ឆ្នាំ២០២៣ ការខាតបង់បានកើនឡើងដល់ ៤,៨៦៧ពាន់លានដុល្លារអាមេរិក ដែលស្មើនឹងការចំណាយលើម្ហូបអាហាររយៈពេល ៣ឆ្នាំរបស់ប្រជាជនគុយបាទាំងអស់។

អ្នកការទូតចិនរូបនេះ បានបន្ថែមថា ប្រទេសចិនសូមជំរុញយ៉ាងខ្លាំងក្លាឲ្យសហរដ្ឋអាមេរិកដកទាំងស្រុង និងជាបន្ទាន់នូវទណ្ឌកម្មផ្នែកសេដ្ឋកិច្ច ពាណិជ្ជកម្ម និងហិរញ្ញវត្ថុប្រឆាំងនឹងគុយបា ហើយបង្កើតទំនាក់ទំនងធម្មតាជាមួយបណ្តាប្រទេសសមាជិកអង្គការសហប្រជាជាតិផ្សេងទៀត ស្របតាមគោលបំណង និងគោលការណ៍នៃធម្មនុញ្ញអង្គការសហប្រជាជាតិ និងបទដ្ឋានជាមូលដ្ឋាន ក្នុងទំនាក់ទំនងអន្តរជាតិ៕