ភ្នំពេញ៖ នៅថ្ងៃទី០៨ ខែមិថុនានេះ កម្ពុជា បានធ្វើជាម្ចាស់ផ្ទះ រៀបចំកិច្ចប្រជុំទ្វេភាគីកម្ពុជា-ចិន លើកទី៩ ស្តីពីកិច្ចសហប្រតិបត្តិការត្រួតពិនិត្យគ្រឿងញៀន តាមប្រព័ន្ធVideo Conference។
នៅក្នុងកិច្ចប្រជុំនេះ នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀនថ្លែងថា បច្ចុប្បន្នចរាចរណ៍ឆ្លងដែនគ្រឿងញៀនខុសច្បាប់នៅមិនទាន់មានភាពស្ងប់ស្ងាត់ទេ ដែលបញ្ហានេះកម្ពុជា ស្នើសុំមិត្តចិនបង្កើនកិច្ចសហប្រតិបត្តិការទប់ស្កាត់ខ្លាំងក្លាបន្ថែមទៀត។
ឯកឧត្តម នាយឧត្តមសេនីយ មាស វិរិទ្ធ បានថ្លែងថា តម្រូវការគ្រឿងញៀននៅតាមបណ្តាប្រទេសនីមួយៗ រួមទាំងទីផ្សារគ្រឿងញៀនខុសច្បាប់មានការកើនឡើងច្រើនជាងមុន ដែលបញ្ហានេះ គឺតម្រូវឱ្យមន្ត្រីអនុវត្តច្បាប់ កម្ពុជា ចិន ត្រូវបង្កើនកិច្ចសហប្រតិបត្តិការគ្នាឱ្យកាន់តែខ្លាំងក្លាបន្ថែមទៀត ជាមួយបណ្តាភាគីពាក់ព័ន្ធទាំងអស់ ធ្វើការរផ្លាស់ប្តូរព័ត៌មានអោយគ្នាទៅវិញទៅមក ដើម្បីបំផ្លាញចោលអោយអស់នូវខ្សែបណ្តាញក្រុមឧក្រិដ្ឋជនគ្រឿងញៀនឆ្លងដែននានា។
ឯកឧត្តម បន្តថា ក្រោមកិច្ចសហប្រតិបត្តិការរវាងកម្ពុជា ចិន កន្លងមកយើងបានបង្ក្រាបបាននូវឧក្រិដ្ឋជនជាតិចិន និងចាប់យកបាននូវគ្រឿងញៀន និងសារធាតុគីមីផ្សំបានជាច្រើនរយគីឡូក្រាម យកធ្វើការបំផ្លាញចោលទាំងអស់។
តាមរយៈកិច្ចប្រជុំទ្វេភាគីកម្ពុជា ចិន នាយឧត្តមសេនីយ មាស វិរិទ្ធ បានថ្លែងអំណរគុណភាគីមិត្តចិន ពិសេសគណៈកម្មាធិការជាតិត្រួតពិនិត្យគ្រឿងញៀនចិន NNCC ដែលតែងតែយកចិត្តទុកដាក់ជួយឧបត្ថម្ភគាំទ្រកម្ពជា ពិសេសអាជ្ញាធរជាតិប្រយុទ្ធប្រឆាំងគ្រឿងញៀន ដើម្បីប្រយុទ្ធប្រឆាំងគ្រឿងញៀននៅកម្ពុជា ហើយតាមរយៈកិច្ចប្រជុំ បានធ្វើអោយកម្ពុជាទទួលបាននូវលទ្ធផល និងបទពិសោធន៍ក្នុងការងារជួយគ្នាទៅវិញទៅមកបង្ក្រាបបទល្មើសនានាពាក់ព័ន្ធនឹងគ្រឿងញៀន និងបន្តសហការគ្នាអោយបានខ្លាំងជាងមុន។
នៅក្នុងកិច្ចប្រជុំទ្វេភាគី ដែលភាគីចិនដឹកនាំដោយ ឯកឧត្តម លាំង យុន អគ្គលេខាធិការប្រតិបត្តិនៃគណៈកម្មាធិការជាតិត្រួតពិនិត្យគ្រឿងញៀនចិន (NNCC) និងជាអគ្គនាយកការិយាល័យត្រួតពិនិត្យគ្រឿងញៀននៃក្រសួងសន្តិសុខសាធារណៈប្រទេសចិន បានកោតសរសើរកិច្ចខិតខំរបស់កម្ពុជា ក្នុងការបង្ការ បង្ក្រាប បទល្មើសគ្រឿងញៀនទោះបីកម្ពុជាកំពុងប្រឈមយ៉ាងក៏ដោយ ហើយភាគីចិនបន្តសហការជួយដល់កម្ពុជាបំផ្លាញដល់ឫសគល់របស់ក្រុមឧក្រិដ្ឋជនគ្រឿងញៀនអន្តរជាតិ រួមទាំងក្រុមឧក្រិដ្ឋជនជាជនជាតិចិន ធ្វើយ៉ាងណាកុំឱ្យឧក្រិដ្ឋជនទាំងនោះប្រើប្រាស់ទឹកដីកម្ពុជាជាកន្លែងផលិតជួញដូរគ្រឿងញៀនទៅកាន់ប្រទេសទីបី៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
