ភ្នំពេញ ៖ ក្នុងរយៈពេល០៩ខែ រាប់ពីខែមករាដល់ខែកញ្ញាឆ្នាំ ២០២៣នេះ កិច្ចប្រតិបត្តិការបោសសម្អាតមីននិងសំ ណល់យុទ្ធភណ្ឌសង្គ្រាមរបស់អង្គភាពសម្រេចបានការរំដោះផ្ទៃដីចម្ការមីននិងចម្ការគ្រាប់បានចំនួន ២.១០៨តំបន់ នៅលើផ្ទៃដីសរុបចំនួន ២២៣.៨៦០.៥០៧ម៉ែត្រក្រឡា ក្នុង នោះផ្ទៃដីចម្ការមីនចំនួន ១៨១.៤០១.៦៥៨ ម៉ែត្រ ក្រឡា និងផ្ទៃដីចម្ការគ្រាប់មានទំហំ ៤២.៤៥៨.៨៤៩ ម៉ែត្រ ក្រឡា។ លទ្ធផលនេះ សម្រេចបាន៨៣,៥១% នៃផែនការឆ្នាំ២០២៣ ។

នេះយោងតាមរបាយការណ៍សង្ខេបដែលបានបង្ហាញនាល្ងាចថ្ងៃទី០១ ខែវិចិ្ឆកា ឆ្នាំ២០២៣ នៅទីបញ្ជាការដ្ឋានសុីម៉ាក់ភ្នំពេញ ខណះប្រជុំប្រកាសតែងតាំងថ្មីក្រុមប្រឹក្សាភិបាលនិងទីប្រឹក្សាអមក្រុមប្រឹក្សាភិបាលអង្គភាពសុីម៉ាក់សំរាប់បន្តអណត្តិរបស់ខ្លួនក្នុងរាជ្ឋាភិបាលអណត្តិទី៧នេះ ។  ក្នុងរបាយការណ៍នេះបញ្ជាក់ថា កិច្ចប្រតិបត្តិការនេះបានរុករកឃើញនិងកម្ទេចចោលគ្រាប់មីននិងយុទ្ធភណ្ឌមិន ទាន់ផ្ទុះគ្រប់ប្រភេទសរុបចំនួន ៦៨.៣៥០គ្រាប់ ។ ប្រជាពលរដ្ឋទទួលផលដោយផ្ទាល់ និង ដោយប្រយោលមានចំនួន ៤០០.៤៩៦ គ្រួសារ។ដោយឡែកក្នុងរយៈពេល ០៩ ខែ (មករា-កញ្ញា) ឆ្នាំ២០២៣នេះអង្គភាពនិងបណ្តាញមីនស្ម័គ្រចិត្តបានចុះធ្វើការផ្សព្វផ្សាយអប់រំការយល់ដឹងពីគ្រោះថ្នាក់ដោយសារគ្រាប់មីននិងសំណល់ជាតិផ្ទុះពីសង្គ្រាមដល់ក្រុមគោលដៅបានចំនួន ១៨.៤០១ លើក ស្មើនឹង ៩១៤.៥៥១ខ្នងផ្ទះ មានប្រជាពលរដ្ឋចូលរួមសរុបចំនួន ១.៤១៨.៨៦៣នាក់។ 

  របាយការណ៍បានបញ្ជាក់បន្ថែមថា ក្រុមការងារក៏បានចុះពិនិត្យទីតាំងគ្រាប់មីនគ្រាប់យុទ្ធភណ្ឌមិនទាន់ផ្ទុះដែលប្រជាពលរដ្ឋបានរាយការណ៍ និងបានកម្ទេចចោលគ្រាប់ មីននិងយុទ្ធភណ្ឌមិនទាន់ផ្ទុះគ្រប់ប្រភេទរួមមានសំណើឆ្លើយតប ២.៧៤៧សំណើ  គ្រាប់មីនAP ចំនួន ១.៤៣៩ គ្រាប់ .គ្រាប់មីនAT ចំនួន ២៥គ្រាប់.គ្រាប់មិនទាន់ផ្ទុះគ្រប់ប្រភេទចំនួន ១២.៤៧៦គ្រាប់និងអាវុធធុនស្រាលចំនួន ៧៤០គីឡូក្រាម ព្រមទាំងបានសហការក្នុងការជួយសម្រប សម្រួលបញ្ជូនជនរងគ្រោះ ដែលគ្រោះថ្នាក់ដោយសារគ្រាប់ មីនគ្រាប់យុទ្ធភណ្ឌមិនទាន់ផ្ទុះទៅមន្ទីរពេទ្យព្រមទាំងបានចុះអន្ដរាគមន៍ពិនិត្យ និងធ្វើការអប់រំនៅទីតាំងផ្ទុះនោះផងដែរ។ ដោយឡែកចំពោះគ្រោះថ្នាក់ដោយសារគ្រាប់មីននិងសំណល់ជាតិផ្ទុះពីសង្គ្រាមមានចំនួន ២៤ ករណី សរុបមានជនរងគ្រោះចំនួន២៧នាក់ក្នុងនោះ (ស្លាប់០៤នាក់ និងរបួស២៣នាក់)៕ អត្ថបទ ៖ ភារម្យ