ក្រុមមន្ត្រីបាននិយាយថា ព្យុះ Ciaran យ៉ាងហោចណាស់បានសម្លាប់មនុស្សម្នាក់ និងបណ្ដាលឲ្យជាង ១លានគ្រួសារគ្មានអគ្គិសនីប្រើប្រាស់ នៅថ្ងៃព្រហស្បតិ៍ (ទី២ ខែវិច្ឆិកា) នេះ ដោយផ្នែកខ្លះនៃតំបន់ Brittany និង Normandy ស្ថិតនៅក្នុងការប្រកាសអាសន្នពណ៌ក្រហម ដែលប្រឈមជាមួយនឹងកម្លាំងខ្យល់បក់ខ្លាំង និងផ្នែកផ្សេងទៀតនៃភាគពាយព្យ ស្ថិតនៅក្នុងការប្រកាសអាសន្នពណ៌លឿងទុំ។

ជនរងគ្រោះ ដែលជាអ្នកបើកបររថយន្តដឹកទំនិញនោះ បានស្លាប់ដោយសារដើមឈើរលំសង្កត់លើនៅភាគឦសាននៃទីក្រុងប៉ារីស ហើយក្រុមគ្រួសារពលរដ្ឋបារាំងចំនួន ១,២លាននាក់ ត្រូវដាច់ចរន្តអគ្គិសនី។ អាជ្ញាធរក្នុងតំបន់ Finistere ( ហ្វីលីស្ទែរ៉េ) នៅតំបន់ Brittany បានជំរុញឲ្យប្រជាជននៅតែក្នុងលំនៅឋានរបស់ខ្លួន ដើម្បីចៀសពីខ្យល់ ដែលបក់បោកក្នុងល្បឿន ២០៧គីឡូម៉ែត្រ ក្នុងមួយម៉ោង ដែលនាំឲ្យមានការរាយការណ៍អំពីរលកកម្ពស់ ២០ម៉ែត្រពីឆ្នេរសមុទ្រ។

ព្យុះ Ciaran ដែលកើតមានមិនយូរប៉ុន្មានបន្ទាប់ពីព្យុះ Babet កាលពី ២សប្តាហ៍មុន ត្រូវបានជំរុញដោយចរន្តទឹកដ៏ខ្លាំង ដែលបានបោកបក់ចេញពីមហាសមុទ្រអាត្លង់ទិក ដោយបង្កបានជាភ្លៀងធ្លាក់ និងខ្យល់បក់បោកយ៉ាងខ្លាំង ដែលបានបណ្តាលឲ្យមានទឹកជំនន់ធំ នៅក្នុងប្រទេសអៀរឡង់ខាងជើង និងផ្នែកខ្លះនៃចក្រភពអង់គ្លេស៕