ក្រុមអ្នកជំនាញរបស់អង្គការសហប្រជាជាតិបានអំពាវនាវកាលពីថ្ងៃព្រហស្បតិ៍ ទី២ វិច្ឆិកា ឲ្យ​មាន​បទ​ឈប់បាញ់មនុស្សធម៌ នៅក្នុង​តំបន់ហ្កាហ្សា​ ដោយនិយាយថា ពេលវេលា​ជិតអស់​ហើយ​សម្រាប់​ប្រជាជន​ប៉ាឡេស្ទីននៅទីនោះ ដែលយល់ថាពួកគេស្ថិតក្នុងហានិភ័យធ្ងន់ធ្ងរ នៃ​អំពើ​ប្រល័យ​ពូជសាសន៍ ។

ក្រុមអាជ្ញាធរសុខាភិបាលក្នុងតំបន់ឡោមព័ទ្ធហ្កាហ្សា គ្រុប់គ្រងដោយក្រុមហាម៉ាស និយាយថា ការ​ទម្លាក់​គ្រាប់បែករយៈពេលជិត ៤ សប្តាហ៍ របស់អ៊ីស្រាអែល លើតំបន់ហ្កាហ្សា ជាការ​សង​សឹក​ចំពោះ​ការ​វាយប្រហារដោយក្រុមខ្មាន់កាំភ្លើងក្រុមហាម៉ាស នៅភាគខាង​ត្បូង​ប្រទេស​អ៊ីស្រាអែល​កាល​ពីថ្ងៃ​ទី៧ ខែតុលា បានសម្លាប់មនុស្សជាង ៩.០០០ នាក់ ភាគច្រើនជាស្ត្រី និងកុមារ។ អ៊ីស្រាអែលនិយាយថា ខ្លួនកំពុងដាក់គោលដៅវាយប្រហារលើក្រុមហាម៉ាសតែប៉ុណ្ណោះ មិន​មែន​ជន​ស៊ីវិល​ទេ ហើយចោទក្រុមនេះ ថាបានប្រើប្រាស់ជនស៊ីវិលធ្វើជាខែល។

តុលាការ​ឧក្រិដ្ឋកម្មអន្តរជាតិកំណត់ឧក្រិដ្ឋកម្មប្រល័យពូជសាសន៍ ថាជាចេតនាជាក់លាក់​ ដើម្បី​បំផ្លាញ​ទាំង​ស្រុង ឬមួយផ្នែកនៃក្រុមជាតិ ជនជាតិ ពូជសាសន៍ ឬសាសនា ដោយការ​សម្លាប់​សមាជិក​របស់​ខ្លួន ឬដោយមធ្យោបាយផ្សេងទៀត រួមទាំងការចាត់​វិធានការ​ដែល​មាន​បំណង​ទប់​ស្កាត់​ការ​ចាប់កំណើត ឬ ការផ្ទេរកុមារដោយបង្ខំពីក្រុមមួយទៅក្រុមមួយទៀត។ 

ថ្លែង​ទៅកាន់សារពេ័ត៌មាន Reuters បន្ទាប់​ពី​សេចក្តី​ថ្លែងការណ៍​របស់​ក្រុម​អ្នក​ជំនាញ​ត្រូវ​បាន​ចេញ​ ម្ចាស់ហត្ថលេខីមួយ ក្នុងចំណោមម្ចាស់ ហត្ថលេខីជាច្រើន គឺលោក ផេដ្រូ អារ៉ូចូ អាហ្កូដូ (Pedro Arrojo Agudo)​អ្នក​រាយការណ៍​ពិសេស​របស់​អង្គការ​សហ​ប្រជាជាតិ​ទទួល​បន្ទុ​ក​សិទ្ធិ​មនុស្ស​ ចំពោះបសុវត្ថិភាពទឹកស្អាត និងអនាម័យ បាននិយាយថា ប្រជាជន​នៅ​តំបន់​ហ្កាហ្សា​ត្រូវ​បាន​ដកហូតសិទ្ធិជាមូលដ្ឋានដំបូងបំផុតសម្រាប់ការរស់នៅ។

ការផ្គត់ផ្គង់ជំនួយដល់តំបន់ហ្កាហ្សាបានជាប់គាំងចាប់តាំងពីអ៊ីស្រាអែលចាប់ផ្តើមទម្លាក់គ្រាប់បែកជុំវិញតំបន់ ដែលមានប្រជាជនរស់នៅយ៉ាងច្រើន ដោយបណ្ដាអង្គការផ្ដល់ជំនួយនានា បាន​និយាយ​ថា គ្មានកន្លែងណាដែលស័ក្ដិសមនឹងការរស់នៅសម្រាប់ប្រជាជននៅទីនោះទេ៕