យ៉ាងហោចណាស់មនុស្ស ៧នាក់ បានស្លាប់ និងមនុស្សរាប់សិបនាក់ បានរងរបួស ខណៈ​ដែល​ព្យុះ Ciarán បានវាយលុកនៅភាគពាយ័ព្យអឺរ៉ុប ជាមួយនឹងភ្លៀងធ្លាក់ខ្លាំង និងខ្យល់​បក់​ខ្លាំង​រហូត​ដល់​ល្បឿន ២០០គីឡូម៉ែត្រក្នុងមួយម៉ោង ដោយបានបំផ្លាញលំនៅឋាន និងបង្ខំឱ្យ​សាលា​រៀន​បិទ​ទ្វារ ហើយក្រុមហ៊ុនអាកាសចរណ៍ និងក្រុមហ៊ុនរថភ្លើងនានា ត្រូវបញ្ឈប់សេវាកម្មរបស់ខ្លួន។

ក្រុម​អាជ្ញាធរបារាំង បាននិយាយកាលពីថ្ងៃព្រហស្បតិ៍ (២ វិច្ឆិកា) ថា អ្នក​បើក​បរ​រថយន្ត​ដឹក​ទំនិញ​ម្នាក់ បានសម្លាប់ដោយដើមឈើរលំលើ នៅក្នុងតំបន់ Aisne ភាគខាងជើងប្រទេសបារាំង ខណៈ​ដែល​មនុស្សជាង ១,២លាននាក់ បានបាត់បង់ការផ្គត់ផ្គង់អគ្គិសនី រួមទាំងប្រជាជន​ប្រហែល​ពាក់​កណ្តាលនៃទីក្រុង Brittany ផងដែរ។

មនុស្សមួយចំនួនទៀតបានស្លាប់នៅក្នុងឧបទ្ទវហេតុ ដែលទាក់ទងនឹងខ្យល់​កន្រ្តាក់​ក្នុង​ល្បឿន​បំបែក​កំណត់​ត្រារបស់ព្យុះ Ciarán មួយនេះ ដូចជាប្រទេសអេស្ប៉ាញ បែលហ្ស៊ិក អ៊ីតាលី និងហូឡង់ ជាដើម ដោយបណ្ដាលឲ្យមនុស្សរាប់សិបនាក់ បានរងរបួស។

ព្យុះ Ciarán ដែលបោកបក់បន្ទាប់ពីព្យុះ Babet កាលពីពីរសប្តាហ៍មុន ត្រូវបានជំរុញ​ដោយ​ចរន្ត​ទឹក​ដ៏​ខ្លាំង ដែលបានបោកបក់ចេញពីមហាសមុទ្រអាត្លង់ទិក ធ្វើឱ្យមានភ្លៀងធ្លាក់ខ្លាំង និង​ខ្យល់​បោក​បក់​យ៉ាងខ្លាំង ដែលបានបណ្តាលឱ្យមានទឹកជំនន់យ៉ាងធំនៅក្នុងប្រទេសអៀរឡង់ខាងជើង និង​ផ្នែកខ្លះនៃចក្រភពអង់គ្លេសផងដែរ៕