ប្រជាជននៅតំបន់ហ្កាហ្សា បានងាកមកប្រើប្រាស់ទឹកសមុទ្រ ដើម្បីងូតទឹក និងបោកសំលៀកបំពាក់របស់ពួកគេ ខណៈប្រឈមការខ្វះទឹកស្អាតធ្ងន់ធ្ងរនៅទូទាំងតំបន់នេះ។

អ៊ីស្រាអែល បានប្រកាសការហ៊ុមព័ទ្ធស្ទើរតែទាំងស្រុងនៅតំបន់ហ្កាហ្សាដែលមានប្រជាជនរស់នៅច្រើន ជាទីជម្រករបស់ពលរដ្ឋប៉ាឡេស្ទីន ២,៣លាននាក់ បន្ទាប់ពីក្រុមសកម្មប្រយុទ្ធហាម៉ាស បានបើកការវាយប្រហារដ៏ភ្ញាក់ផ្អើល កាលពីថ្ងៃទី ៧ ខែតុលា ដោយបានសម្រុកចូលតាមសហគមន៍អ៊ីស្រាអែល និងបានសម្លាប់មនុស្ស ១.៤០០នាក់។ ជនស៊ីវិលប៉ាឡេស្ទីន បានទទួលរងការខ្វះអាហារ ប្រេងឥន្ធនៈ ទឹកផឹក និងថ្នាំពេទ្យ។

ពលរដ្ឋនៅទីក្រុង Deir al-Balah's ជាទីក្រុងមានមនុស្សចង្អៀតនៅតំបន់ហ្កាហ្សាភាគកណ្តាល បាននិយាយថា «យើងព្រួយបារម្ភពីជំងឺ និងការរាតត្បាតមេរោគ ដូច្នេះយើងមកកាន់សមុទ្រដើម្បីងូតទឹក បោកសំលៀកបំពាក់ ងូតទឹកឲ្យកូនៗរបស់យើង ព្រោះថាពុំមានទឹកដែលយើងអាចទទួលទានបាននោះទេ។ សូម្បីតែទឹកផឹក ក៏យើងត្រូវទិញនៅតាមផ្លូវដែរ ហើយវាមានតម្លៃថ្លៃខ្លាំង។

ជាងមួយភាគបីនៃមន្ទីរពេទ្យចំនួន ៣៥កន្លែង នៅតំបន់ហ្កាហ្សា មិនដំណើរការទេ ដោយមន្ទីរពេទ្យជាច្រើនកន្លែងបានប្រែក្លាយទៅជាជំរំជនភៀសខ្លួនភ្លាមៗ។