ក្រុមប្រឹក្សាជនភៀសខ្លួនន័រវ៉ែស (NRC) កាលពីថ្ងៃព្រហស្បតិ៍ (ទី២ ខែវិច្ឆិកា) បានឲ្យដឹងថា មនុស្សរហូតដល់ ១០.០០០នាក់ កំពុងឆ្លងចូលទៅក្នុងប្រទេសអាហ្វហ្គានីស្ថាន ខណៈដែលកាលកំណត់របស់ប្រទេសប៉ាគីស្ថាន ផុតកំណត់សម្រាប់ជនបរទេសគ្មានឯកសារ ដែលតម្រូវឲ្យចាកចេញ បើពុំនោះសោតនឹងប្រឈមជាមួយការបណ្តេញចេញ។

អ្នកគ្រប់គ្រងផ្នែកតស៊ូមតិរបស់ NRC លោកស្រី Becky Roby បាននិយាយថា អាជ្ញាធរ និងភ្នាក់ងារមនុស្សធម៌ កំពុងធ្វើការ ២៤ម៉ោងលើ២៤ម៉ោង ក្នុងមួយថ្ងៃ ដើម្បីដោះស្រាយនូវអ្វី ដែលលោកស្រីបានពិពណ៌នាថា ជា «ចំនួនមនុស្សដ៏មិនគួរឲ្យជឿ»។ ដើម្បីព្យាយាមទប់ទល់នឹងលំហូរភ្លាមៗ រដ្ឋបាលដែលគ្រប់គ្រងដោយក្រុមតាលីបង់ ក្នុងប្រទេសអាហ្វហ្គានីស្ថាន បាននិយាយថា ជំរុំបណ្តោះអាសន្នត្រូវបានបង្កើតឡើង ហើយអាហារ និងជំនួយវេជ្ជសាស្រ្ត នឹងត្រូវបានផ្តល់ជូន ប៉ុន្តែភ្នាក់ងារជំនួយសង្គ្រោះ បានរាយការណ៍ពីស្ថានភាពធ្ងន់ធ្ងរទៅៗ នៅទូទាំងព្រំដែន។

សូមបញ្ជាក់ថា អាជ្ញាធរប៉ាគីស្ថាន បានចាប់ផ្តើមប្រមូលជនបរទេស ដែលគ្មានឯកសារ ដែលភាគច្រើនជាជនជាតិអាហ្វហ្គានីស្ថាន នៅប៉ុន្មានម៉ោងមុនថ្ងៃកាលកំណត់នៅថ្ងៃពុធ (ទី១ ខែវិច្ឆិកា)។ ប្រជាជនអាហ្វហ្គានីស្ថានជាង ១លាននាក់ អាចនឹងត្រូវចាកចេញ ឬប្រឈមមុខនឹងការចាប់ខ្លួន និងការបណ្តេញចេញ ដោយសារឱសានវាទ ដែលដាក់ចេញដោយរដ្ឋាភិបាលប៉ាគីស្ថាន កាលពី ១ខែមុន៕