ប្រទេសកូរ៉េខាងជើង បានថ្កោលទោសការបាញ់សាកល្បងថ្មីៗនេះនៃមីស៊ីលបាលីស្ទីកអន្តរទ្វីបធ្វើឡើងដោយសហរដ្ឋអាមេរិក ដែលត្រូវបានអង្កេតការណ៍ដោយគណៈប្រតិភូកូរ៉េខាងត្បូង។ ទីភ្នាក់ងារសារព័ត៌មានរដ្ឋ កូរ៉េខាងជើង បានចេញផ្សាយនៅថ្ងៃសុក្រនេះ នូវសេចក្តីថ្លែងការណ៍អ្នកអត្ថាធិប្បាយយោធា អំពីការបាញ់មីស៊ីល Minuteman III ។ សហរដ្ឋអាមេរិក បានបាញ់សាកល្បងកាលពីថ្ងៃអង្គារ នៅមូលដ្ឋានមួយកន្លែងក្នុងរដ្ឋកាលីហ្វរនីញ៉ា។

មន្ត្រីការពារជាតិកូរ៉េខាងត្បូង កំពុងអង្កេតការណ៍អំឡុងដំណើរទស្សនកិច្ចលើកដំបូងក្នុងរយៈពេល៧ឆ្នាំមកនេះ។ ក្រសួងការពារជាតិរបស់ប្រទេសនិយាយថា ក្រុមមន្ត្រីបានបញ្ជាក់ភាពស្របច្បាប់នៃការប្តេជ្ញាចិត្តទប់ស្កាត់ដែលបានពង្រីករបស់សហរដ្ឋអាមេរិក ក្នុងគោលបំណងការពារសម្ព័ន្ធមិត្តរបស់ខ្លួន ដោយអាវុធនុយក្លេអ៊ែរ និងសមត្ថភាពផ្សេងៗទៀត។ សេចក្តីថ្លែងការណ៍របស់អ្នកអត្ថាធិប្បាយកូរ៉េខាងជើង បានចាត់ទុកសកម្មភាពយោធារបស់ប្រទេសកូរ៉េខាងត្បូង និងសហរដ្ឋអាមេរិក កាលពីពេលថ្មីៗ ជាការបង្ករឿងយ៉ាងពិតប្រាកដ និងជាទង្វើសត្រូវដោយឥតគិតក្រែង ដែលបង្កើនភាពតានតឹងផ្នែកយោធាជាឯកតោភាគី នៅក្នុងឧបទ្វីបកូរ៉េ។

ប្រទេសកូរ៉េខាងជើង បានប្រើប្រាស់ ប្រព័ន្ធផ្សព្វផ្សាយរដ្ឋ ដើម្បីរិះគន់សកម្មភាពយោធាថ្មីៗនេះ រវាងសហរដ្ឋអាមេរិក និងកូរ៉េខាងជើង។ សកម្មភាពទាំងនេះរួមមានការចូលចតនៅកំពង់ផែនៃនាវាផ្ទុកយន្កហោះដើរដោយថាមពលនុយក្លេអ៊ែររបស់សហរដ្ឋអាមេរិកនៅកំពង់ផែប្រទេសកូរ៉េខាងត្បូង និងការដាក់ពង្រាយនៅក្នុងប្រទេសនេះនូវយន្តហោះទម្លាក់គ្រាប់បែកយុទ្ធសាស្ត្រ មានសមត្ថភាពដឹកជញ្ចូនអាវុធនុយក្លេអ៊ែរ។