អ្នកដំណើរ ៣នាក់ បានដាក់ពាក្យប្ដឹង ចំពោះក្រុមហ៊ុនអាកាសចរណ៍ Alaska Airlines កាលពីថ្ងៃព្រហស្បតិ៍ (ទី២ ខែវិច្ឆិកា) ដោយលើកឡើងពីហេតុផលពីការទទួលរងនូវទុក្ខវេទនាផ្លូវចិត្ត ក្រោយកើតហេតុការណ៍ដ៏មិនគួរឲ្យជឿមួយ កាលពីខែមុន ដែលធ្វើឲ្យអ្នកបើកយន្តហោះសម្រាកពីការងារម្នាក់ ត្រូវបានចោទប្រកាន់ពីបទព្យាយាមពន្លត់ម៉ាស៊ីនយន្តហោះ ខណៈដែលរូបគេកំពុងអង្គុយក្នុងកាប៊ីនយន្តហោះ (បន្ទប់បើកបរយន្តហោះ) អំឡុងពេលធ្វើដំណើរពីរដ្ឋវ៉ាស៊ីនតោនទៅទីក្រុងសាន់ហ្វ្រាន់ស៊ីស្កូ។

ក្នុងពាក្យបណ្ដឹង ដែលបានដាក់កាលពីថ្ងៃព្រហស្បតិ៍ នៅក្នុងតុលាការកំពូលនៅតំបន់ King County ក្នុងរដ្ឋវ៉ាស៊ីនតោន អ្នករស់នៅក្រុង San Francisco ឈ្មោះ Matthew Doland និង Theresa Stelter រួមជាមួយ Paul Stephen ដែលរស់នៅទីក្រុង Kenmore រដ្ឋវ៉ាស៊ីនតោន បានចោទប្រកាន់ថា អាកាសយានិក មិនគួរត្រូវបានអនុញ្ញាតឲ្យនៅក្នុងកាប៊ីនយន្ដហោះទេ ព្រោះបុគ្គលរូបនោះ មានជម្ងឺធ្លាក់ទឹកចិត្ត និង គេងមិនបានគ្រប់គ្រាន់។ ក្រុមហ៊ុនអាកាសចរណ៍ Alaska Airlines មិនបានឆ្លើយតបភ្លាមៗនោះឡើយ ចំពោះសារអេឡិកត្រូនិក ដែលផ្ញើទៅសុំការអត្ថាធិប្បាយ។

សូមរំលឹកថា ក្នុងឯកសារចោទប្រកាន់ អាជ្ញាធរបានឲ្យដឹងថា អ្នកបើកបរយន្តហោះរបស់ក្រុមហ៊ុនអាកាសចរណ៍ Alaska Airlines លោក Joseph David Emerson វ័យ ៤៤ឆ្នាំ កំពុងអង្គុយនៅកៅអីពិសេស ដែលជាកៅអីបន្ថែមនៅក្នុងកាប៊ីនយន្តហោះ នៅពេលនោះ ភ្លាមៗ លោកបាននិយាយថា «ខ្ញុំមិនអីទេ» ហើយព្យាយាមទាញដងដៃចំនួន២ ដែលភ្ជាប់ជាមួយប្រព័ន្ធពន្លត់អគ្គិភ័យ និងប្រព័ន្ធបន្ថយប្រេងឥន្ធនៈ។

នគរបាលបានប្រាប់ថា យន្តហោះ Flight 2059 បានដូរទិសដៅចុះចតដោយសុវត្ថិភាពទៅកាន់ទីក្រុង Portland ក្នុងរដ្ឋ Oregon បន្ទាប់ពីក្រុមអាកាសយានិក បង្ក្រាបលោក Emerson បានយ៉ាងឆាប់រហ័ស ហើយលោកព្រមឲ្យដាក់ខ្នោះដោយមិនរើបម្រះ ក្នុងយន្តហោះផ្នែកខាងក្រោយ៕