ភ្នំពេញ ៖  មន្ត្រីជាន់ខ្ពស់នៃអាជ្ញាធរមីន បានបញ្ជាក់ប្រាប់តំណាងការិយាល័យការបរទេស និងអភិវឌ្ឍន៍នៃចក្រភពអង់គ្លេសថា តាមរយៈការងារបោសសម្អាតមីន និងសំណល់ជាតិផ្ទុះពីសង្រ្គាម មានតែស្នាមញញឹម និងសុភមង្គលរបស់ប្រជាជនកម្ពុជាប៉ុណ្ណោះ ពីព្រោះលទ្ធផលកើតចេញការ បោសសម្អាតមីន គឺប្រជាពលរដ្ឋទទួលបាននូវដីប្រកប ដោយសុវត្ថិភាព និងមានជីវភាពរស់នៅល្អប្រសើរជាងមុន។ 

ការបញ្ជាក់បែបនេះខណះទេសរដ្ឋមន្រ្តី និងជាអនុប្រធានទី១ អាជ្ញាធរមីន ឯកឧត្តមបណ្ឌិតលី ធុជ នៅល្ងាចថ្ងៃទី ០៣ ខែវិច្ឆិកា ឆ្នាំ ២០២៣ នេះ បានទទួលជួបពិភាក្សាការងារជាមួយ លោក អេនឌ្រូវ ហ្គ្រីហ្វីត ( Andrew Griffiths ) ប្រធានក្រុមការងារដោះមីននៃការិយាល័យ FCDO ចក្រភពអង់គ្លេស ស្តីពីភាពជាដៃគូ និងកិច្ចសហ ប្រតិបត្តិការសកម្មភាពមីននៅកម្ពុជា ក្រោមកម្មវិធីសកម្ម ភាពមីនសកល (Global Mine Action Program me_GMAP)។

 តាងនាម សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានអាជ្ញាធរមីន ឯកឧត្តមទេសរដ្ឋមន្រ្តី លី ធុជ បានថ្លែងអំណរគុណយ៉ាងជ្រាលជ្រៅជូនចំពោះរដ្ឋាភិបាល និងប្រជាជននៃចក្រ ភពអង់គ្លេស ចំពោះការគាំទ្រវិស័យសកម្មភាពបោស សម្អាតមីនមនុស្សធម៌នៅកម្ពុជា ព្រមទាំងបានតាំងចិត្តបន្តចូលរួមជួយដល់កម្ពុជាស្របតាមផែនការគោលដៅកម្ពុជាគ្មានមីនឆ្នាំ២០២៥។ ឯកឧត្តមទេសរដ្ឋមន្រ្តី បានលើក ឡើងថា ចាប់តាំងពីឆ្នាំ១៩៩៨ ចក្រភពអង់គ្លេស បានចូលរួមគាំទ្រដល់កិច្ចប្រតិបត្តិការសកម្មភាពមីន តាមរយៈអង្គការដោះមីន HALO Trust, MAG, NPA និងអង្គការ APOPO ព្រមទាំងបានចូលរួមគាំទ្រដល់ការកសាងសមត្ថភាពដល់មន្រ្តីបុគ្គលិកអាជ្ញាធរមីន ផងដែរ។

ឯកឧត្តមទេសរដ្ឋមន្រ្តី បានបន្តទៀតថា ក្រោយសម្រេចគោលដៅឆ្នាំ២០២៥ កម្ពុជានៅតែត្រូវការជាចាំបាច់ចំពោះការ ចូលរួមពីចក្រភពអង់គ្លេស និងបណ្តាដៃគូដទៃទៀត ក្នុងការដោះស្រាយហានិភ័យដែលនៅសេស សល់ពីសំណល់ជាតិផ្ទុះពីសង្រ្គាមក្រោយឆ្នាំ ២០២៥។ ឯកឧត្តមទេសរដ្ឋមន្រ្តី ក៏បានបញ្ជាក់បន្ថែមផងដែរ អំពីវឌ្ឍនភាព និងការវិវត្តន៍ថ្មីៗនៃសកម្មភាពមីននៅកម្ពុជា ជាពិសេសការយក ចិត្តទុកដាក់និងការតាំងចិត្តខ្ពស់របស់រាជរដ្ឋាភិបាលក្រោមការដឹកនាំដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្រ្តី ដែលសម្តេចបានចាត់ទុកសកម្មភាពមីន គឺជាកិច្ចការជួយសង្រ្គោះនិងផ្តល់សុភមង្គលជាប្រជាព លរដ្ឋកម្ពុជា ហើយតាមរយៈការងារបោសសម្អាតមីននេះ គឺមានតែស្នាមញញឺម និងសុភមង្គលរបស់ប្រជាពលរដ្ឋកម្ពុជាប៉ុណ្ណោះ៕ អត្ថបទ ៖ ភារម្យ