​វៀតណាម៖ ប្រទេស​វៀតណាម ដែល​ធ្លាប់​ទទួល​បាន​មេដាយ​សម្រាប់​ការ​ដោះស្រាយ​ការរីក​រាល​ឆ្លង​សកល​ជំងឺ COVID-19​ដោយ​ជោគជ័យ​នោះ បាន​ចាប់​ផ្តើម​ស្នើសុំ​ការ​​​បរិច្ចាគ​ពី​សាធារណជន ដើម្បី​ទិញ​វ៉ាក់សាំង​បង្ការ ស្រប​ពេល​ដែល​ពួកគេ​ពិបាក​ទប់ស្កាត់​រលក​ថ្មី​នៃ​ជំងឺ​ដ៏​កាច​សាហាវ​មួយ​នេះ​។​

​ប្រទេស​នៅ​តំបន់​អាស៊ីអាគ្នេយ៍​មួយ​នេះ ទើបតែ​ចាក់​វ៉ាក់សាំង​បានតែ​១​ភាគរយ ​នៃ​ចំនួន​ពលរដ្ឋ​សរុប​របស់​ខ្លួន​ជិត ១០០​លាន​នាក់​ប៉ុណ្ណោះ ហើយ​ក្រុម​អាជ្ញាធរ មានការ​ប្រុង​ប្រយ័ត្ន​កាន់​តែខ្លាំង​ចំពោះ​ករណី​ឆ្លង​ហក់​ឡើង​ខ្ពស់ កាលពីពេល​ថ្មីៗ​នេះ​។​

​ចាប់​តាំងពី​សប្តាហ៍​មុន​រហូតមក អ្នកប្រើប្រាស់​ទូរស័ព្ទ​ដៃ ទទួល​បាន​សារ​ចំនួន​៣ ជំរុញ​ឲ្យ​ពួកគេ​បរិច្ចាគ​ដល់​មូលនិធិ​ទិញ​វ៉ាក់សាំង​បង្ការ​ជំងឺ COVID-19 ខណៈ​ដែល​មន្ត្រី​រដ្ឋការ ត្រូវបាន​ជំរុញ​ឲ្យ​ចូលរួមចំណែក​ខ្លះៗ​នៃ​ប្រាក់ខែ​របស់​ពួកគេ​។​

​អ្នកស្រុក​មួយ​ចំនួន ដែល​ព្រួយបារម្ភ​ពី​ផលប៉ះពាល់​សេដ្ឋកិច្ច​វៀតណាម​បង្កឡើង​ដោយសារតែ​ជំងឺ COVID-19 បាន​និយាយ​ប្រាប់​ទីភ្នាក់ងារ​ព័ត៌មាន AFP​ថា ពួកគេ​គាំទ្រ កិច្ចខិតខំ​ស្វែងរក​មូលនិធិ​មួយ​នេះ​។​

​លោក ង្ងៀ​ន ទួន អា​ញ់ គឺជា​មន្ត្រី​រដ្ឋការ​មួយរូប បាន​និយាយប្រាប់ AFP​ថា លោក​បាន​ផ្ទេរ​សាច់ប្រាក់ ៥០​ដុល្លារ ចេញពី​កុង​ធនាគារ​របស់លោក ដើម្បី​រួមចំណែក​ក្នុង​វិភាគទាន​វ៉ាក់សាំង​បង្ការ​ជំងឺ COVID-19​។

​គួរ​ឲ្យ​ដឹង​ថា តាម​បណ្តា​ខេត្ត​ឧស្សាហកម្ម​នៅ​ភាគ​ខាងជើង​វៀតណាម ដែលជា​ទីតាំង​ក្រុមហ៊ុន​ធំៗ​ដូចជា​ក្រុមហ៊ុន Samsung និង​ក្រុមហ៊ុន Foxconn បាន​រង​ផលប៉ះពាល់​ខ្លាំងជាងគេ​ដោយសារតែ​ការរីក​រាលដាល​ឆ្លង​ជំងឺ COVID-19​កាលពីពេល​ថ្មីៗ​នេះ​។​

​យោង​តាម​សេចក្តីរាយការណ៍​ពី​សារព័ត៌មាន​រដ្ឋ បាន​ឲ្យ​ដឹងថា កម្មករ​រាប់ម៉ឺន​-​រាប់សែន​នាក់ បាន​បាត់បង់​ការងារ​ធ្វើ​នៅ​ទូទាំងប្រទេស ក្នុងនោះ​រង្គសាល ភោជនីយដ្ឋាន ត្រូវបាន​បង្ខំ​ឲ្យ​បិទទ្វារ​នៅតាម​ទីក្រុង​ធំៗ ដូចជា​ទីក្រុង​ហាណូយ និង​ហូ​ឈី​មិញ ហើយ​ការជួប​ជុំគ្នា​តាម​ទីសាធារណៈ​ត្រូវបាន​លុបចោល​ផងដែរ ។​

​សូមបញ្ជាក់ថា គិត​មកទល់នឹង​ថ្ងៃ​អង្គារ​នេះ ប្រទេស​វៀតណាម បាន​រាយការណ៍​ករណី​ឆ្លង​ជំងឺ COVID-19​សរុប​ចំនួន ៩.១០៣​នាក់ និង​ករណី​ស្លាប់ ៥៤​នាក់​៕​