ភ្នំពេញ៖សាកលវិទ្យាល័យខេមតិច សហការជាមួយសាកលវិទ្យាល័យឈៀងម៉ៃ (Chiang Mai university) និង សាកលវិទ្យាល័មេហ្វាលួង(Mae Fah Luang University) ក្រោមការឧបត្ថម្ភដោយគម្រោងមេគង្គ-ឡានឆាង បានរៀបចំសិក្ខាសាលា ស្តីពីការអភិវឌ្ឍបច្ចេកវិទ្យាវៃឆ្លាត ដើម្បីបញ្ជៀសហានិភ័យ និងគ្រប់គ្រងសុវត្ថិភាព នៅក្នុងវិស័យឧស្សាហកម្ម នៅថ្ងៃទី៣ ខែវិចិ្ឆកា ឆ្នាំ២០២៣ នៅបរិវេណសាកលវិទ្យាល័យខេមតិច។

សិក្ខាសាលានេះធ្វើឡើងក្នុងគោលបំណង បង្ហាញនិសិ្សតនិង ក្រុមហ៊ុនផ្សេងសម្រាប់ការប្រើប្រាស់IOT និងបញ្ញាសិប្បនិមិ្មត នៅក្នុងទីក្រុងវៃឆ្លាតដែលអាចប្រើប្រាស់ក្នុងចង្វាក់ផលិតកម្ម និងប្រព័ន្ធសុវត្ថិភាព។

នៅក្នុងការបើកកម្មវិធី បណ្ឌិតព្រហ្ម សុភា សាស្ត្រាចារ្យជាន់ខ្ពស់ និងជាព្រឹទ្ធបុរសរងមហាវិទ្យាល័យវិស្វកម្មនៃ សាកលវិទ្យាល័យខេមតិច បានមានប្រសាសន៍ថា សាកលវិទ្យាល័យខេមតិច ជាសាកលវិទ្យាល័យបច្ចេកវិទ្យា បង្រៀនជំនាញ ថ្នាក់ឧត្តមសិក្សាដែលឆ្លើយតបនឹងទីផ្សារការងារនាពេលបច្ចុប្បន្ន និងអនាគត ក៍ដូចជាតម្រូវការ បច្ចេកវិទ្យានៅក្នុង សម័យបដិវត្តន៍ឧស្សាហកម្ម ៤.០។ដូច្នេះ ការរៀបចំកម្មវិធីនេះ គឺជាឱកាសដ៏ពិសេសមួយដែលសាកលវិទ្យាល័យនិងក្រុមហ៊ុនដៃគូរបស់សាកលវិទ្យាល័យខេមតិច បានបង្ហាញបច្ចេកវិទ្យាថ្មីៗ ដើម្បីបញ្ជៀសហានិភ័យ និងគ្រប់គ្រងសុវត្ថិភាពនានា នៅក្នុងវិស័យឧស្សាហកម្មដល់និស្សិតនៃសាកលវិទ្យាល័យខេមតិច ក៏ដូចជាក្រុមហ៊ុនដៃគូរបស់យើង។ 

លោកបានបន្តថា សិក្ខាសាលានេះដែរ ក៏បានបង្ហាញអំពីជោគជ័យមួយ នៃកិច្ចសហប្រតិបត្តិការរវាង រដ្ឋាភិបាល អ្នកស្រាវជ្រាវ ក៏ដូចជាក្រុមហ៊ុនឯកជន ក្នុងការអភិវឌ្ឍបច្ចេកវិទ្យាថ្មីៗ ដើម្បីដោះស្រាយបញ្ហាសង្គមក្នុងតំបន់។ លោកសង្ឃឹមថា និស្សិត នឹងទទួលបានគំនិតថ្មីៗ ក្នុងការប្រើប្រាស់ចំណេះដឹង និង ចំណេះធ្វើ ដែលបានសិក្សានៅសាកលវិទ្យាល័យ ដើម្បីដោះស្រាយបញ្ហានាពេលអនាគត។

លោក ប្រាដន ស៊ូរីផូង(Pradorn Sureephong) សាស្រ្តាចារ្យនៃសាកលវិទ្យាល័យឈៀងម៉ៃ បានមានប្រសាសន៍ថា ក្នុងតំណាក់កាលដំបូង យើងបានសាកល្បងបំពាក់បច្ចេកវិទ្យានេះនៅរោងម៉ាស៊ីនកិនស្រូវដើម្បីបង្កើនចង្វាក់ផលិតកម្ម ក៏ដូចជាបញ្ជៀសហានិភ័យ និងគ្រប់គ្រងសុវត្ថិភាពនៅក្នុងរោងចក្រ។ លោកបានលើកឡើងថានឹងបន្តការសិក្សាស្រាវជ្រាវបច្ចេកវិទ្យានេះលើវិស័យផ្សេងៗ ដូចជាវិស័យសំណង់ វិស័យធនាគារ ជាដើម។

លើសពីនេះទៅទៀត លោកបណ្ឌិត សេង ទូច ប្រធាននាយកដ្ឋានគោលនយោបាយវិទ្យាសាស្ត្រ បច្ចេកវិទ្យា និង នវានុវត្តន៏ នៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និង នវានុវត្តន៍ ក៏បានចែករំលែកការស្រាវជ្រាវ ករណីសិក្សា ការអភិវឌ្ឍទីក្រុងវៃឆ្លាតនៅតំបន់អាស៊ីអាគ្នេយ៍ផងដែរ៕ ដោយ ៖ បូរ៉ាវី