ភ្នំពេញ ៖ ខណះនៅបាំងតែ១ថ្ងៃទៀតប៉ុណ្ណោះ ការប្រឡងថ្នាក់មធ្យមសិក្សាទុតិយភូមិ ( បាក់ឌុប ) ក៏នឹងចូលមកដល់នោះ ឃើញថានៅតាមបណ្តាមណ្ឌលប្រលងនានា ក្នុងរាជធានីភ្នំពេញ បានតុបតែងសម្អាត និងរៀបចំរបៀបរៀបរយសណ្តាប់ធ្នាប់រួចរាល់ សម្រាប់ដំណើរការ នៃការប្រលងអាចប្រព្រឹត្តិទៅបានដោយរលូនល្អ ។ 

វិទ្យាល័យបាក់ទូក ជាមណ្ឌលប្រឡងមួយ ក្នុងចំណោមមណ្ឌលប្រឡងជាច្រើន ដែលបានគិតគូរក្នុងការ រៀបចំទីតាំង សម្រាប់សិស្សានុសិស្ស ប្រឡងបាក់ឌុបឆ្នាំនេះ ។ 

លោកតូច កន្តាល់ នាយកវិទ្យាល័យបាក់ទូក បានប្រាប់ឱ្យដឹងថា ៖ វិទ្យាល័យ បានរៀបចំរួចរាល់តាមបណ្តាបន្ទប់ទាំងអស់ ទាំងតុកៅអី ឱ្យបានរៀបរយ និងការថែទាំងសម្អាតបរិស្ថានអនាម័យ នៅក្នុងបរិវេណ នៃមណ្ឌលប្រឡងទាំងមូលឱ្យបានស្អាត និងមានសោភ័ណ្ឌភាពល្អប្រសើរ ។ សួនច្បារ រួមទាំងបន្ទប់ទឹកដុះលាងសម្អាត ហើយនៅតាមមាត់របងមណ្ឌលប្រឡង ពិសេសក្លោងទ្វារច្រកចូល ក៏មានបំពាក់ដងទង់ជាតិ នៃព្រះរាជាណាចក្រកម្ពុជាផងដែរ ។ 

លោកនាយកបានបន្ថែមឱ្យដឹងថា ៖ បន្ទប់ទាំងអស់ក្នុងមណ្ឌលបាក់ទូក ត្រូវបានចាក់សោរទាំងអស់ ចាប់ពីថ្ងៃទី០៤ វិឆ្ឆិកានេះ រហូតដល់ថ្ងៃទី០៦ ជាថ្ងៃប្រឡងទើបមានការបើក ។ ក្នុងនោះដែរ នៅថ្ងៃទី០៥ ស្អែកនេះ ជាថ្ងៃដែលមានការបិទឈ្មោះសម្រាប់កំណត់បន្ទប់ប្រឡង ដូច្នោះសិស្សានុសិស្ស នឹងនាំគ្នាមកពិនិត្យឈ្មោះ សម្រាប់ការប្រឡងឆ្នាំ២០២៣នេះ ។

បេក្ខជនត្រៀមប្រឡងបាក់ឌុបឆ្នាំនេះ បានបង្ហាញការយល់ឃើញថា ពួកគាត់បានត្រៀមខ្លួនជាស្រេចសម្រាប់ការប្រលង ហើយការប្រឡងលើកនេះ ជាដំណាក់កាលសម្ខាន់មួយដែលពួកគាត់ចំបាច់ប្រឹងប្រែងឱ្យបានល្អបំផុត ដើម្បីជាប់ចំណាត់ថ្នាក់ និងទទួលបាននិន្ទេសល្អ លទ្ធិផលសម្រាប់ខ្លួនឯង គ្រួសារ និងសង្គមជាតិ ។ 

សូមបញ្ជាក់ថា សម័យប្រឡងមធ្យមសិក្សាទុតិយភូមិឆ្នាំ២០២៣នេះ នឹងដំណើរការទៅរយះពេល២ថ្ងៃ គឺនៅថ្ងៃទី៦ និងថ្ងៃទី៧ ខែវិច្ឆិកា ឆ្នាំ២០២៣ ខាងមុខនេះ ៕  អត្ថបទ ៖ លីហេង