សៀមរាប៖ ក្រុមការងារអាជ្ញាធរជាតិអប្សរា កំពុងមមាញឹកក្នុងការកែលម្អផ្លូវថ្មើរជើង និងទេសភាពនៅខាងមុខប្រាសាទលានជល់ដំរី ដើម្បីលើកសោភណ្ឌភាពប្រាសាទបុរាណ និងធ្វើយ៉ាងណាដើម្បីទាក់ទាញអ្នកទេសចរណ៍ ដែលមកដល់ពេលនេះ បានសម្រេចប្រមាណជាង៦០ភាគរយហើយ។
លោក សោម សុផារ៉ាត អនុប្រធាននាយកដ្ឋានទ្រទ្រង់បច្ចេកទេស និងគម្រោងអន្តរវិស័យ នៃអាជ្ញាធរជាតិអប្សរា មានប្រសាសន៍នៅថ្ងៃទី០៨ ខែមិថុនាថា ការកែលម្អរនៅខាងមុខលានជល់ដំរីនេះ ធ្វើឡើងកាលពីដើមខែកុម្ភៈឆ្នាំ២០២១កន្លងមក ដែលមកដល់ពេលនេះ សម្រេចបាន៦៥ភាគរយហើយ ពោលនៅសល់តែរៀបចំក្រាលថ្មបាយក្រៀមសម្រាប់ផ្លូវថ្មើរជើង ដាំស្មៅនៅខាងមុខប្រាសាទ និងប្រព័ន្ធបង្ហូរទឹក។ លោកបន្ដថា ផ្លូវថ្មើរជើងនេះមានប្រវែងប្រមាណជាង៣០០ម៉ែត្រ ដោយការកែលំអនេះឱ្យសម ស្របទៅនឹងលំនាំប្រាសាទបុរាណ ដើម្បីលើកតម្លៃវប្បធម៌ ក៏ដូចធ្វើយ៉ាងណាឱ្យខាងមុខប្រាសាទលា នជល់ដំរីនេះ មានទេសភាព និងសោភណភាពបៃតង មានការទាក់ទាញអ្នកទេសចរណ៍ជាតិ និងអន្ដរជាតិទៅទស្សនាក្រោយបញ្ចប់ជំងឺកូវីដ១៩នាពេលខាងមុខ។
លោកបន្ថែមថា គម្រោងនេះនឹងបញ្ចប់ ក្នុងរយៈពេល២ខែទៀត និយាយរួម នឹងអោយរួចរាល់នៅក្នុងឆ្នាំ២០២១នេះ។
លោកបន្តថា ក្រោយពីស្ថាបនានិងកែលំអរួចរាល់ហើយ នៅទីលាននោះនឹងមានទេសភាពស្រស់ត្រកាល គ្រប់រដូវកាល លែ ងមានភាពរញ៉េរញ៉ៃដូចជាការបើកបររថយន្ដក្បែរប្រាសាទដូចមុនទៀតហើយ។
លោក សុផារ៉ាត បន្ថែមថា កន្លងមកទីលានជល់ដំរីមានផ្លូវកៅស៊ូសម្រាប់ធ្វើចរាចរណ៍ បានធ្វើឱ្យប៉ះពាល់ដល់ប្រាសាទបុរាណ ដោយសារតែរំញ័រនៃគ្រឿងយន្ដ ទើបអាជ្ញាធរជាតិអប្សរា កែលំអឡើងវិញ ធ្វើផ្លូវថ្មើរជើងសម្រាប់ដើរទស្សនាប្រាសាទ និងដើម្បីលើកតម្កើងនិងថែរក្សា អភិរក្សវប្បធម៌ជាតិ។ព្រះលានជល់ដំរី"នេះមានទីតាំងស្ថិតនៅក្នុងក្នុងបរិវេណក្នុងក្រុងអង្គរធំ នៅទីនេះមានសក្តានុពលទេសចរ ណ៍សំខាន់ៗដូចជាប្រវត្តិនៃការសាងសង់ ទីតាំង និងរចនាបថ ដែលមានភ្ញៀវទេសចរអាចមកលំហែកម្សាន្ត មើលប្រាសាទ ចម្លាក់ក្បូរក្បាច់ ព្រៃព្រឹក្សា និងប្រវត្តិសាស្ត្រផងដែរ។ លានជល់ដំរីនេះត្រូវបានស្ថាបនាឡើងនៅចុងសតវត្សទី១២ នៃគ្រិស្តសករាជ ដោយព្រះបាទជ័យវរ្ម័នទី៧៕ អត្ថបទ៖ ឈិត សាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
