ភ្នំពេញ ៖ ខណៈថ្ងៃទី២៦ ខែវិច្ឆិកាខាងមុខនេះ ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នឹងឈានចូលមកដល់ ទូក ង ដែលបានចុះឈ្មោះ ចូលរួមប្រកួតមួយចំនួនបានរៀបចំជួសជុលកែលម្អរួចរាល់ ហើយទូកខ្លះទៀតបាននិងកំពុងពន្លឿនការជួសជុល តុបតែងកែលំអរ និងរៀបចំដឹកជញ្ជូនដឹកចូលរាជធានីភ្នំពេញ។

​លោក អុន សុផុន សមាជិកក្រុមប្រឹក្សាឃុំព្រែកទទែន ថ្លែងប្រាប់ BTV នៅថ្ងៃទី៤ ខែវិច្ឆិកា ថា នៅថ្ងៃនេះដែរក្រុមកីឡាករទូក ង របស់ឃុំព្រែកតាទែន បាននាំគ្នាមកទទួលទូក ង ខ្នាតវែង ពីព្រះចៅអធិការវត្តប្រជុំនរទី ក្រពើហារ ក្រុងតាខ្មៅ ដើម្បីដឹកទៅ វត្តព្រែកទទែន ធ្វើជួសជុល តុបតែងកែលម្អបន្ថែមឲ្យមានសោភ័ណ្ឌភាពស្អាត ត្រៀមហាត់សមផងដែរ។

សំលេង៖

លោក បន្តថា សម្រាប់ទូក ង នៅឃុំព្រែកតាទែននេះ នឹងជួសជុលទៅតាមលក្ខណៈបច្ចេកទេសឱ្យបានសមស្រប ព្រមទាំងត្រួតពិនិត្យលើភាពរឹងមាំ សុវត្ថិភាព និងត្រូវត្រៀមសម្ភារៈសម្រាប់អុំទូកនាពេលខាងមុខឱ្យបានគ្រប់គ្រាន់សំដៅធ្វើយ៉ាងណាឲ្យទូកមានភាពរឹងម៉ាំ និងជ័យជម្នះក្នុងការប្រកួត។

តាមការឲ្យដឹងពីឯកឧត្តម ប៊ុន វាស្នារ ទីប្រឹក្សាអមគណៈកម្មាធិការជាតិរៀបចំបុណ្យជាតិ-អន្តរ គិតត្រឹមថ្ងៃទី១ ខែវិច្ឆិកា គណៈកម្មការធិការបានទទួលទូកចុះឈ្មោះចូលរួមប្រកួតចំនួន ៣៤៤ មានទាំងទូកអុំ ទូកចែវ និងទូកខ្នាតអន្តរជាតិ។ 

ឯកឧត្តមបញ្ជាក់ថា នៅក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ រយៈពេល៣ថ្ងៃ ចាប់ពីថ្ងៃទី២៦ ដល់ថ្ងៃទី២៨ ខែវិច្ឆិកា ឆ្នាំ២០២៣នេះ ក៏នឹងមានប្រទីពចូលរួមបណ្តែត នៅក្នុងទន្លេចតុមុខ មុខព្រះបរមរាជវំាង មានចំនួន៣០ប្រទីព ក្នុងមានប្រទីពមកពីបណ្តាក្រសួងស្ថាប័នរដ្ឋចំនួន២៧ ប្រទីប សហភាពសហព័ន្ធយុវជនកម្ពុជា ស.ស.យ.ក ១ និងប្រទីប មកពីវិស័យឯកជន ចំនួន២ រួមមានប្រទីប ក្រុមហ៊ុនវឌ្ឍនៈ និងប្រទីបក្រុមហ៊ុនកូកាកូឡា ដែលនឹងបង្ហាញពីភាពរីកចំម្រើនលូតលាស់ របស់កុលបុត្រខ្មែរធ្វើបាន៕

​អត្ថបទ ៖ ស៊ុម សុខជា