ភ្នំពេញ ៖តាមការគ្រោងទុកការរៀបចំខួបអនុស្សាវរីយ៍លើកទី៧០ នៃទិវាបុណ្យឯករាជ្យជាតិ ៩វិច្ឆិកា និងទិវាកំណើតនៃកងយោធនពលខេមរភូមិន្ទ ក្នុងឆ្នាំ២០២៣នេះ នឹងប្រារព្ធធ្វើឡើងយ៉ាងអធិកអធមជាងមុនឆ្នាំមុន ពោលមានអ្នកចូលរួមរាប់ម៉ឺននាក់ និងការរៀបចំមានលក្ខណៈពិសេសៗជាច្រើនទៀត។ នេះបើតាម ឯកឧត្តម ប៊ុន វាស្នារ ទីប្រឹក្សាអមគណៈកម្មាធិការជាតិរៀបចំបុណ្យជាតិ-អន្តរជាតិ បានផ្តល់បទសម្ភាសជាមួយ BTV។

​នៅក្នុងបទសម្ភាសនោះ ឯកឧត្តមមានប្រសាសន៍ថា ការៀបចំប្រារព្ធទិវាទាំងពីរនេះនៅក្នុងរាជធានីភ្នំពេញ គឺមានការរៀបចំ មីទ្ទិញមហាជន នៅមុខព្រះបរមរាជវាំង និងព្រះរាជពិធីប្រទានភ្លើងជ័យ ព្រះរាជពិធីពន្លត់ភ្លើងជ័យ ក្រោមព្រះរាជាធិបតីភាពដ៍ខ្ពង់ខ្ពស់បំផុតរបស់ ព្រះករុណា ព្រះបាទសម្តេចព្រះបរមនាថ នរោត្តសីហមុនី ព្រះមហាក្សត្រនៃព្រះរាជណាចក្រកម្ពុជា ជាគោរពរសក្ការៈដ៍ខ្ពង់ខ្ពស់បំផុត។ ហើយនៅពេលយប់មានការអុជកាំជ្រួចអបអរសាទរចំនួន៣លើក គឺនៅយប់ថ្ងៃទី៩-១០ និង១១ខែវិច្ឆិកា ឆ្នាំ២០២៣។ ក្រៅពីនេះក៏មានការចូលរួមរបស់ក្រសួងស្ថានប័ននានា និងប្រជាពលរដ្ឋជាច្រើនផងដែរ ដើម្បីត្រៀមអបអរទិវាបុណ្យឯករាជ្យជាតិ ៩វិច្ឆិកា និងទិវាកំណើតនៃកងយោធនពលខេមរភូមិន្ទ។

សូមជម្រាបថា ទិវាបុណ្យឯករាជ្យជាតិ ៩ វិច្ឆិកា ត្រូវបានប្រារព្ធឡើងជារៀងរាល់ឆ្នាំ ដើម្បីបង្ហាញពីឯករាជ្យជាតិខ្មែរ និងជាការឧទ្ទិសដល់ព្រះរាជបូជនីយកិច្ច របស់អតីត ព្រះមហាក្សត្រ ព្រះបាទសម្ដេចព្រះនរោត្តម សីហនុ ព្រះបរមរតនកោដ្ឋ ដែលព្រះអង្គ បានលះបង់ព្រះកាយពល និងព្រះបញ្ញាញាណ នៅក្នុងព្រះរាជបូជនីយកិច្ច ទាមទារឯករាជ្យ ពីអាណានិគមបារាំង នៅថ្ងៃទី៩ ខែវិច្ឆិកា ឆ្នាំ១៩៥៣។ 

បន្ទាប់ពីទទួលបានឯករាជ្យពីប្រទេសបារាំង កម្ពុជាបានសាងសង់វិមានឯករាជ្យឡើង នៅឆ្នាំ១៩៥៨ ដើម្បីជានិមិត្តរូបបញ្ជាក់ថា ប្រទេសកម្ពុជា បានទទួលឯករាជ្យពីប្រទេសបារាំង មានសេរីភាពរួចផុតពីអានិគមបរទេស និងសម្រាប់ជាស្តូបគោរពវិញ្ញាណក្ខន្ធ ដល់អ្នកស្លាប់ ក្នុងបុព្វហេតុជាតិផងដែរ។  អត្ថបទ ៖ ទូច សោភ័ណ