ពោធិ៍សាត់ ៖ ព្រឹត្តិការណ៍អុំទូកពោធិ៍សាត់លើកទី៤ ឆ្នាំ២០២៣ នឹងចាប់ផ្តើមដំណើរការចាប់ពីម៉ោង២រសៀលថ្ងៃទី៤ ខែវិចិ្ឆកា នេះតទៅ។ 

​នាព្រឹកថ្ងៃទី៤ ខែវិចិ្ឆកានេះ ឯកឧត្តម ក្រុមប្រឹក្សាខេត្ត និងឯកឧត្តម ខូយ រីដា អភិបាលខេត្តពោធិ៍សាត់ បានដឹកនាំក្រុមកីឡាករអុំទូក ទាំង៣៣ទូក ចូលអុជធូក សុំសេចក្តីសុខ នៅព្រះអង្គចៅសែន ស្ថិតនៅលើកបុរីវប្បធម៌កោះសំពៅមាស ក្នុងនោះដែរ ឯកឧត្តមបានលើកឡើងថា ការរៀបចំព្រឹត្តិការណ៍អុំទូកពោធិ៍សាត់ឆ្នាំ២០២៣នេះឡើង គឺជាការចូលរួមថែរក្សាវប្បធម៌ ប្រពៃណីដ៏ល្អផូរផង់ ដែលដូនតាដែលបានបន្សល់ទុកឱ្យកូនចៅ ហើយរាល់ការប្រកួតប្រជែងទូក ង គឺប្រកួតក្នុងអត្ថន័យរឹតចំណងមិត្តភាព និងសាមគ្គីភាពរបស់ប្រជាពលរដ្ឋខ្មែរ។ 

ក្នុងឱកាសព្រឹត្តិការណ៍នេះ រដ្ឋបាលខេត្តពោធិ៍សាត់ បានរៀបចំទាំងផ្នែកសោភ័ណ្ឌភាព ការតុបតែងលម្អ ផ្នែកអនាម័យបរិស្ថាន ការងារសន្តិសុខ សណ្តាប់ធ្នាប់ ជាដើមបានយ៉ាងល្អប្រសើរ ដើម្បីត្រៀមទទួលប្រជាពលរដ្ឋ និងភ្ញៀវទេសចរជាតិ អន្តរជាតិ មកលេងកម្សាន្ត។ ចំណែក ក្រុមកីឡាករអុំទូកក៏បានត្រៀមលក្ខណៈ និងប្តេជ្ញាចិត្ត សម្រាប់ការចូលរួមប្រកួតក្នុងព្រឹត្តិការណ៍នេះផងដែរ។

សូមជម្រាបថាឆ្នាំនេះ ទូក ង ដែលចូលរួមប្រណាំងប្រជែងយកជ័យជម្នះមានចំនួន ៣៣ ទូក ក្នុងនោះទូកតំណាងខេត្តកំពត ចូលរួមចំនួន ១ ទូក និងទូកតំណាងខេត្តបាត់ដំបងមកចូលរួមចំនួន ២ ទូក។ ចំពោះទីតាំងរៀបចំពិធីប្រណាំងទូក បានរៀបចំធ្វើនៅតាមដងស្ទឹងពោធិ៍សាត់ ក្នុងក្រុងពោធិ៍សាត់ចាប់ពីចំណុចស្ពានថ្មផ្លូវជាតិលេខ៥ រហូតដល់ចំណុចវេទិកាអុំទូកពោធិ៍សាត់៕  អត្ថបទ ៖ ភិរុណ ពៅ