ឥណ្ឌូនេស៊ី ៖ ប្រធានាធិបតីឥណ្ឌូនេស៊ី លោក Joko Widodo នៅថ្ងៃសៅរ៍ (ទី៤ ខែវិច្ឆិកា) នេះ បានប្រកាសឲ្យដឹងពីការដឹកជញ្ជូនដំបូងនូវជំនួយមនុស្សធម៌ទៅកាន់តំបន់ហ្គាហ្សា ដែលរួមមានស្បៀងអាហារ និងការផ្គត់ផ្គង់ផ្នែកវេជ្ជសាស្រ្ត សម្រាប់ប្រជាជនប៉ាឡេស្ទីន នៅតំបន់ហ៊ុមព័ទ្ធ ដែលត្រូវបានញាំញីដោយជម្លោះ។

សម្ភារផ្គត់ផ្គង់ ដែលមានទម្ងន់ ៥១,៥តោននេះ ត្រូវបានផ្តល់ដោយរដ្ឋាភិបាល និងអង្គការមនុស្សធម៌មួយចំនួន នៅក្នុងប្រទេសឥណ្ឌូនេស៊ី។

ដោយថ្លែងនៅឯមូលដ្ឋានទ័ពអាកាស Halim Perdanakusuma ជាកន្លែង ដែលជំនួយកំពុងត្រូវបានលើកដាក់លើយន្តហោះ ដើម្បីដឹកឆ្ពោះទៅកាន់ប្រទេសអេហ្ស៊ីបនោះ លោក Widodo បានសង្កត់ធ្ងន់ថា ជំនួយនេះ គឺជាវិធីបង្ហាញពីសាមគ្គីភាពជាមួយនឹងការតស៊ូរបស់ប្រជាជនប៉ាឡេស្ទីន។

គួរបញ្ជាក់ដែរថា ប្រជាជនមូស្លីមភាគច្រើនបំផុតរបស់ពិភពលោក បានសម្តែងការគាំទ្រជាប់ជានិច្ច ចំពោះភាពជារដ្ឋរបស់ប៉ាឡេស្ទីន នាពេលកន្លងមក ហើយការតវ៉ាធំៗ ដែលគាំទ្រប៉ាឡេស្ទីន បានកើតឡើងជាញឹកញាប់ គិតចាប់តាំងពីការផ្ទុះជម្លោះ កាលពីថ្ងៃទី៧ ខែតុលា៕