ហ្វីលីពីន ៖ ប្រទេសហ្វីលីពីន និងជប៉ុន កាលពីថ្ងៃសុក្រ (ទី៣ ខែវិច្ឆិកា) បានឲ្យដឹងថា ប្រទេសទាំង២ នឹងចាប់ផ្តើមការពិភាក្សា ដើម្បីឲ្យមានកតិកាសញ្ញាការពារជាតិ ដែលនឹងអនុញ្ញាតឲ្យមានដាក់ពង្រាយកងទ័ពនៅលើទឹកដីរបស់គ្នាទៅវិញទៅមក។

ទីក្រុងតូក្យូ និងម៉ានីល ដែលជាសម្ព័ន្ធមិត្តដ៏យូរយារណាស់មកហើយរបស់ទីក្រុងវ៉ាស៊ីនតោន កំពុងពង្រឹងកិច្ចសហប្រតិបត្តិការលើវិស័យការពារជាតិរបស់ពួកគេ ខណៈដែលប្រទេសទាំង២ ស្វែងរកការទប់ទល់នឹងសម្ពាធយោធា ដែលកំពុងកើនឡើងជាលំដាប់របស់ប្រទេសចិន។

ប្រធានាធិបតីហ្វីលីពីនលោក Ferdinand Marcos Jr និងនាយករដ្ឋមន្ត្រីជប៉ុនលោក Fumio Kishida បានធ្វើសេចក្តីប្រកាសនេះ បន្ទាប់ពីមានកិច្ចពិភាក្សា នៅទីក្រុងម៉ានីល។

លោក Marcos និងលោក Kishida បានឲ្យដឹងទៀតថា ប្រទេសជប៉ុន ក៏នឹងផ្តល់ឲ្យហ្វីលីពីននូវប្រព័ន្ធតាមដានរ៉ាដា នៅតាមឆ្នេរសមុទ្រ ដែលជាផ្នែកនៃកញ្ចប់ជំនួយសន្តិសុខចំនួន ៦០០លានយ៉េន (៤លានដុល្លារអាមេរិក)។

សូមបញ្ជាក់ថា លោក Kishida គឺជានាយករដ្ឋមន្ត្រីជប៉ុនដំបូងគេ ដែលបានទៅបំពេញទស្សនកិច្ចនៅប្រទេសហ្វីលីពីន គិតចាប់តាំងពីឆ្នាំ២០១៧ មក។ រូបលោកគ្រោងនឹងថ្លែងសុន្ទរកថា ក្នុងសម័យប្រជុំសភាចម្រុះពិសេស នាថ្ងៃសៅរ៍នេះ ដោយនាំឲ្យលោកក្លាយជាមេដឹកនាំជប៉ុនដំបូងគេ ដែលធ្វើដូច្នេះ៕