ប្រធានាធិបតីអ៊ុយក្រែន លោក Volodymyr Zelensky បានសារភាពថា សង្រ្គាមអ៊ីស្រាអែល និង​ហ្កាហ្សា​កំ​ពុងដកការផ្តោតអារម្មណ៍ ពីជម្លោះក្នុងប្រទេសអ៊ុយក្រែន។

លោកបាននិយាយថា នេះគឺជា គោលដៅមួយក្នុងចំណោមគោលដៅជាច្រើនរបស់រុស្ស៊ី ដែលបាន​ចាប់​ផ្តើម​ការលុកលុយពេញបន្ទុកលើអ៊ុយក្រែនកាលពីខែកុម្ភៈ ឆ្នាំ ២០២២។

ថ្លែងនៅ​ក្នុងសន្និសីទសារព័ត៌មានកាលពីថ្ងៃសៅរ៍នៅទីក្រុង Kyiv ជាមួយប្រធាន​គណៈកម្មការ​អឺរ៉ុប​លោក​ស្រី អឺសូឡា វ៉ុនឌើឡេយិន (Ursula von der Leyen ) លោក Zelensky បាន​និយាយ​ថា វាច្បាស់ណាស់ថាសង្រ្គាមនៅមជ្ឈិមបូព៌ា កំពុងដកការផ្តោតអារម្មណ៍ ពីសង្រ្គាម​នៅ​អ៊ុយក្រែន​។

ហើយលោកបានបដិសេធ ដែលថាការប្រយុទ្ធគ្នាក្នុងប្រទេសអ៊ុយក្រែន បានឈាន​ដល់​ភាព​ជាប់​គាំង​ បើទោះបីជាមានការវាយតម្លៃនាពេលថ្មីៗនេះ ចំពោះស្ថានភាពសង្រ្គាម ដោយ​ឧត្តម​សេនីយ៍​យោធា​ជាន់​ខ្ពស់របស់ប្រទេសនេះ ក៏ដោយ។

ការវាយលុករបស់​អ៊ុយក្រែននៅភាគខាងត្បូងរហូតមកដល់ពេលនេះ មានភាពរីកចម្រើនតិចតួច។

ស្ថានភាពបែបនេះ បានជំរុញឱ្យមានក្ដីបារម្ភ​ពី​ភាព​នឿយហត់​នៃ​សង្គ្រាម​ក្នុង​ចំណោម​សម្ព័ន្ធ​មិត្ត​លោក​ខាង​លិច​របស់ទីក្រុង Kyiv ព្រមទាំងមានការលើក​ឡើង​ពី​ភាព​ស្ទាក់​ស្ទើរ​កាន់​តែ​ខ្លាំង​ឡើង​នៅ​ក្នុង​រដ្ឋធានីមួយចំនួន ក្នុងការបន្តផ្តល់អាវុធទំនើបៗ និងមូលនិធិដល់អ៊ុយក្រែន៕