ជនជាតិអ៊ីស្រាអែល រួមទាំងក្រុមគ្រួសារជនរងគ្រោះថ្ងៃទី ៧ ខែតុលា បានប្រមូលផ្តុំគ្នានៅទីក្រុង Tel Aviv កាលពីថ្ងៃសៅរ៍ ៤ វិច្ឆិកា ដោយអំពាវនាវឱ្យមេដឹកនាំអ៊ីស្រាអែល ធានា​ការ​ដោះលែង​ចំណាប់ថ្នូរ​ដែលចាប់ដោយក្រុមសកម្មប្រយុទ្ធហាម៉ាសនៅតំបន់ហ្កាហ្សា។

របស់ក្មេងលេង ត្រូវបានបង្ហាញនៅ​ក្នុង​ការតវ៉ា ដើម្បី​ជានិមិត្ត​រូប​ដល់កុមារ​ដែលត្រូវបានចាប់​ធ្វើជា​ចំណាប់ថ្នូរ ដោយក្រុមសកម្មប្រយុទ្ធហាម៉ាស ស្របពេលរាប់រយនាក់បានគ្រវីទង់ជាតិអ៊ីស្រាអែល និង​រូបថតរបស់អ្នកបាត់ខ្លួន។

អ៊ីស្រាអែលនិយាយថា ក្រុមហាម៉ាស ដែលគ្រប់គ្រងតំបន់ហ្កាហ្សាស្ទ្រីបប៉ាឡេស្ទីន បានសម្លាប់​មនុស្ស ១.៤០០នាក់ និងចាប់មនុស្សចំណាប់ខ្មាំងជាង ២៤០នាក់ផ្សេងទៀត ក្នុងការ​ចូលលុក​លុយ​ភាគខាងត្បូងក្នុងទឹកដីអ៊ីស្រាអែល កាលពីថ្ងៃទី៧ ខែតុលា ។ 

ចំណាប់ខ្មាំង​ជា​ច្រើននាក់នៅតែត្រូវបានឃុំខ្លួនក្នុងតំបន់ហ្កាហ្សា ជាកន្លែងដែលយោធា​អ៊ីស្រាអែល​បាន​បើកការវាយប្រហារតាមអាកាស និងការវាយលុកថ្មើជើង និងបានដាក់​ការ​ឡោមព័ទ្ធ​។ មន្ត្រីសុខាភិបាលហ្កាហ្សា បាននិយាយកាលពីថ្ងៃសៅរ៍ថា ជនជាតិប៉ាឡេស្ទីន ៩.៤៨៨ នាក់បានស្លាប់ រួមទាំង កុមារចំនួន ៣.៩០០ នាក់៕