មន្ត្រីសុខាភិបាលបាននិយាយថា យន្តហោះចម្បាំងជាច្រើនគ្រឿងរបស់អ៊ីស្រាអែល បានវាយ​ប្រហារ​ជំរំជនភៀសខ្លួននៅតំបន់ហ្កាហ្សា នៅព្រឹកថ្ងៃអាទិត្យ ដោយបាន​សម្លាប់​មនុស្ស​យ៉ាង​ហោច​ណាស់ ៣៨នាក់ និងរាប់សិបនាក់រងរបួស។

ការវាយប្រហារនេះបានកើតឡើងនៅពេលដែលអ៊ីស្រាអែលបាននិយាយថា ខ្លួននឹងបន្ត​ការ​វាយ​លុក កំទេចដែនដីរបស់មេដឹកនាំក្រុមហាម៉ាស ទោះបីជា​មាន​ការ​អំពាវនាវ​ពី​សហរដ្ឋ​អាមេរិក​ឱ្យ​ផ្អាក​ការប្រយុទ្ធគ្នាដើម្បីផ្ដល់ឱកាសឲ្យជនស៊ីវិលកំពុងរងទុក្ខ ទទួលបានជំនួយ ក៏ដោយ។

អ៊ីស្រាអែលបានច្រានចោលគំនិតនៃការបញ្ឈប់ការវាយលុករបស់ខ្លួន សូម្បីតែសម្រាប់ការផ្អាក ប្រយុទ្ធសម្រាប់មនុស្សធម៌រយៈពេលខ្លីដែលស្នើឡើងដោយរដ្ឋមន្ត្រីការបរទេសអាមេរិកលោក Antony Blinken ក្នុងអំឡុងពេលដំណើរទស្សនកិច្ចបច្ចុប្បន្នរបស់លោកនៅក្នុងតំបន់នេះក្ដី។ ផ្ទុយទៅវិញ ប្រទេសនេះបានលើកឡើងថា ក្រុមហាម៉ាសកំ​ពុង​រង​សម្ពាធ​ខ្លាំង​ពីកងកម្លាំង​ពេញ​បន្ទុក នៃកងទ័ពរបស់ខ្លួន។

រដ្ឋមន្ត្រីក្រសួងការពារជាតិអ៊ីស្រាអែល លោក Yoav Gallant បាននិយាយថា អ្នកគ្រប់​គ្នា​ដែល​ស្ថិត​នៅក្នុងទីក្រុងហ្កាហ្សា កំពុងតែប្រឈមគ្រោះថ្នាក់ដល់ជីវិត ។

លោក Medhat Abbas អ្នកនាំពាក្យក្រសួងសុខាភិបាលហ្កាហ្សាបាននិយាយនៅថ្ងៃអាទិត្យថា ការវាយ​ប្រហារតាមអាកាស បានប៉ះចំប្រហារជំរំជនភៀសខ្លួន ម៉ាកហាហ្ស៊ី (Maghazi) នៅ​កណ្តាលតំបន់ហ្កាហ្សាទាំងយប់អាធ្រាត្រ ដោយបានសម្លាប់មនុស្សយ៉ាងហោចណាស់៣៨ នាក់ និង​រាប់សិបនាក់ទៀតរងរបួស៕