​បាល់ទាត់៖ ​ក្រុម​ជើងឯក​ពិភពលោកឆ្នាំ២០១៨ បារាំង​បាន​យកឈ្នះ​ប៊ុល​ហ្ការី ៣-០ ក្នុង​ជំនួប​មិត្តភាព​កំដៅ​សាច់ដុំ​ចុងក្រោយ មុន​ឆ្ពោះទៅ​ការប្រកួត​ជើងឯក​ទ្វីបអឺរ៉ុប Euro ២០២០​។ បារាំង​បានដាក់​កីឡាករ​សំខាន់​ចូល​លេង​ក្នុងជំនួប​មិត្តភាព​នេះ ដោយ​រួមមាន​ខ្សែប្រយុទ្ធ​ជួរមុខ​ទាំងបី Kylian Mbappe, Karim Benzeman និង Antoine Griezmann​។​

​ខ្សែប្រយុទ្ធ Barcelona, Antoine Griezmann ជា​អ្នកបើក​ការនាំ​មុខមុន​ដោយ​ប្រើ​បច្ចេកទេស Bicycle Kick អោយ​បារាំង​នាំ​មុខមុន​ក្នុង​វគ្គ​ទី១ នាទី​ទី២៩​។ ការប្រកួត​ជិត​នឹង​ចប់​ទៅហើយ​ខ្សែប្រយុទ្ធ​ដែល​ទើប​ជួយ Chelsea លើក​ពាន UEFA Champions League, Olivier Giroud បាន​ងើប​ពី​កៅអី​បម្រុង​ផ្លាស់ប្ដូរ​ចូល​ក៏​រក​បាន ២​គ្រាប់​ម្នាក់ឯង​នៅ​នាទី​ទី៨៣ និង ៩០​។ នេះ​ជា​ការ​ត្រៀមខ្លួន​បាន​យ៉ាង​ល្អ​សំរាប់​ក្រុម​បារាំង​មុន​ទៅ Euro ដោយ​បាន​យកឈ្នះ​ក្នុង​ជំនួប​មិត្តភាព​ទាំងពីរ​របស់​ខ្លួន ​ពោលគឺ​ឈ្នះវែ​ល ៣-០ និង​ឈ្នះ​ប៊ុល​ហ្ការី ៣-០​។ ​បារាំង​ស្ថិត​ក្នុង​ពូ​ល F ដោយ​នឹង​ត្រូវ​ជួប​ជាមួយ​អាល្លឺម៉ង់​នៅ​ថ្ងៃ​ទី​១៥ ខែ​មិថុនា​នេះ មុន​បន្ត​ជួប​ជាមួយ​ហុង​គ្រី និង​ចុងក្រោយ​ជួប​ព័រ​ទុយ​ង​ហ្កា​ល់​។​

​លទ្ធផល​ប្រកួត​មិត្តភាព​ផ្សេងទៀត ​ក្រុម​អេ​ស្ប៉ា​ញ​ជួប​ជាមួយ​លី​ទុយ​អា​នី ខណៈ​អេ​ស្ប៉ា​ញ​ប្រើប្រាស់​កីឡាករ​យុវជនអាយុ​ក្រោម ២១​ឆ្នាំ​យកឈ្នះ​លី​ទុយ​អា​នី ៤-០​។ ​ក្រុម​ធំ​អេ​ស្ប៉ា​ញ​បាន​លុបចោល​ជំនួប​មិត្តភាព​នេះ​ បន្ទាប់ពី​ប្រធាន​ក្រុម Sergio Busquet តេស្ត​វិជ្ជមាន Covid-19 កាលពី​ថ្ងៃអាទិត្យ ​ហើយ​កីឡាករ​ក្នុង​ក្រុម​ផ្សេងទៀត​ត្រូវ​ហ្វឹកហាត់​នៅ​ដាច់ដោយឡែក​៕

​អត្ថបទ​៖​នាង សុភា​វុ​ធ