ចិន៖ រដ្ឋមន្ត្រីការបរទេស​ចិន ​លោក Wang Yi បាន​ទទូច​ដល់​សហភាព​មី​យ៉ាន់​ម៉ា​ឱ្យ​អនុវត្តន៍​ “ការ​ស្រប​មតិ​គ្នា ៥​ចំណុច​” ដែល​បាន​ព្រមព្រៀង​ដោយ​ថ្នាក់ដឹកនាំ​ នៃ​សមាគម​ប្រជាជាតិ​អាស៊ីអាគ្នេយ៍ហៅ​កាត់​ថា ASEAN​ ដើម្បី​ជួយ​ធ្វើ​ឱ្យ​ស្ថានការណ៍​មាន​ស្ថិរភាព​។​

​លោក ​Wang ​បាន​ស្នើ​ឡើង​កាលពី​ថ្ងៃ​អង្គារ​ទៅកាន់​លោក Wunna Maung Lwin ដែល​ត្រូវ​បាន​តែង​តាំង​ជា​រដ្ឋមន្ត្រីការបរទេស​មី​យ៉ាន់​ម៉ា​ ដោយ​យោធា​បន្ទាប់ពី​រដ្ឋប្រហារ​។ អ្នក​ទាំង​ពីរ​បាន​ជួប​គ្នា​នៅ​ទីក្រុង​ឆុង​ឈី​ង​ប្រទេស​ចិន​។​ ការ​ស្រប​មតិ​គ្នា រួមបញ្ចូល​ទាំង​ការ​អំពាវនាវ​ឱ្យ​បញ្ឈប់​អំពើ​ហិង្សា​ជា​បន្ទាន់ និង​ការ​បញ្ជូន​ប្រេសិត​ពិសេស​ពី​អាស៊ាន​ ដើម្បី​សម្របសម្រួល​ដំណើរការ​សន្ទនា​។​ ​កិច្ច​ប្រជុំ​នេះ​បាន​ធ្វើឡើង​មួយថ្ងៃ ​បន្ទាប់ពី​លោក ​Wang ​បាន​ជួបពិភាក្សា​ជាមួយ​សម​ភាគី​របស់​លោក​មកពី​អាស៊ាន​ ដែល​បាន​អំពាវនាវ​ឱ្យ​មាន​ការ​គាំទ្រ​ពី​ប្រទេស​ចិន ​ដើម្បី​អនុវត្តន៍​ការព្រមព្រៀង​គ្នា​នេះ​។​ ​ស្ថានីយ​ទូរទស្សន៍​រដ្ឋ​មី​យ៉ាន់​ម៉ា​បាន​រាយការណ៍​ថា​ ប្រទេស​ចិន​គាំទ្រ​ការ​ធ្វើ​ឱ្យ​ប្រសើរ​ឡើង​នៃ​ស្ថានភាព ​ដោយ​ផ្អែកលើ​ការព្រមព្រៀង​ ៥​ចំណុច ​និង​គោលការណ៍​នៃ​ការ​មិន​ជ្រៀតជ្រែក​ក្នុង​កិច្ចការ​ក្នុងស្រុក​។​

​ក្រសួង​ការបរទេស​ចិន​បាន​ប្រកាស​ថា ​លោក​ Wang ​បាន​ជំ​រុញ​ឱ្យ​គ្រប់​ភាគី​ទាំងអស់​នៅ​ក្នុង​សហភាព​មី​យ៉ាន់​ម៉ា ​អនុវត្តន៍​ការព្រមព្រៀង​គ្នា​លុបបំបាត់​អំពើ​ហិង្សា​គ្រប់​រូបភាព និង​ចាប់ផ្ដើម​ដំណើរការ​នៃ​ការ​ផ្លាស់ប្ដូរ​តាម​បែប​ប្រជាធិបតេយ្យ​។​ ក្រសួង​ក៏បាន​ដកស្រង់​សម្ដី​ លោក​ Wang ​ផង​ដែរ​ដែល​និយាយ​ថា ​គោលនយោបាយ​មិត្តភាព​របស់​ចិន​ចំពោះ​មី​យ៉ាន់​ម៉ា ​គឺ​សំដៅ​ទៅលើ​ប្រជាជន​ទាំងអស់​នៅ​ក្នុង​ប្រទេស​នោះ​៕

អត្ថបទ៖ សុខមាន