អ៊ីស្រាអែល ៖ កងទ័ពអ៊ីស្រាអែលបានចេញផ្សាយវីដេអូកាលពីថ្ងៃអាទិត្យ (ទី៥ ខែវិច្ឆិកា) ដែលខ្លួននិយាយថា បង្ហាញពីការបើក «ច្រករបៀងមនុស្សធម៌» ដើម្បីអនុញ្ញាតឲ្យជនស៊ីវិល នៅភាគខាងជើងតំបន់ហ្គាហ្សា ជម្លៀសចេញទៅភាគខាងត្បូង។

វីដេអូទាំងនោះ មានអមដោយសារជាវីដេអូ ដែលបាននិយាយជាភាសាអារ៉ាប់ពីវរសេនីយ៍ឯកកងទ័ពអ៊ីស្រាអែល ដោយស្នើឲ្យអ្នកស្រុកនៅតំបន់ហ្គាហ្សាចាកចេញពីផ្នែកខាងជើងនៃតំបន់ហ៊ុមព័ទ្ធប៉ាឡេស្ទីននេះ ដែលលោកបានពណ៌នាថា ជាតំបន់សង្រ្គាម។

សារព័ត៌មាន Reuters មិនអាចបញ្ជាក់ពីទីតាំង ឬកាលបរិច្ឆេទ ដែលវីដេអូត្រូវបានថតនោះឡើយ។ ចំណងជើងនៅលើវីដេអូនោះ ត្រូវបានសរសេរឡើងដោយប្រភព។

សូមបញ្ជាក់ថា មន្ត្រីសុខាភិបាលនៅតំបន់ហ្គាហ្សា ដែលគ្រប់គ្រងដោយក្រុមហាម៉ាស បាននិយាយថា ប្រជាជនប៉ាឡេស្ទីនជាង ៩.៧៧០នាក់ ត្រូវបានសម្លាប់នៅក្នុងសង្គ្រាម ដែលបានចាប់ផ្តើមផ្ទុះឡើង នៅពេលដែលក្រុមហាម៉ាស បានបើកការវាយប្រហារដ៏គួរស្លុតចិត្តមួយលើភាគខាងត្បូងអ៊ីស្រាអែល កាលពីថ្ងៃទី៧ ខែតុលា ដោយបានសម្លាប់មនុស្ស ១.៤០០នាក់ និងចាប់ចំណាប់ថ្នូរជាង ២៤០នាក់៕