ប្រទេសរុស្ស៊ី និងអ៊ុយក្រែន បានផ្តល់ដំណើររឿងនៃការប៉ះទង្គិចគ្នា កាលពីចុងសប្តាហ៍អំពីអ្វីដែលកំពុងកើតឡើង នៅតាមខ្សែត្រៀមជួរមុខ ក្នុងតំបន់ហ្សាប៉ូរីហ្សា (Zaporizhzhia) ដោយទីក្រុងម៉ូស្គូ បាននិយាយថា ខ្លួនបានបញ្ឈប់ការវាយបករបស់ទីក្រុងគីវ ហើយកងទ័ពរបស់អ៊ុយក្រែន បាននិយាយថា ខ្លួននៅតែបន្ត។

អ៊ុយក្រែន បានដណ្តើមមកវិញនូវភូមិតូចៗមួយចំនួន នៅតំបន់ហ្សាប៉ូរីហ្សា ភាគអាគ្នេយ៍ ចាប់តាំងពីការចាប់ផ្តើមនៃការវាយលុករបស់ខ្លួន ក្នុងខែមិថុនា ប៉ុន្តែការរីកចម្រើន មានតិចតួច ហើយខ្សែត្រៀមជួរមុខដ៏ធំនៅភាគខាងកើត និងខាងត្បូងរបស់ប្រទេសនេះ បានប្រែប្រួលតិចតួច ក្នុងឆ្នាំមុន។

លោក Yevgeny Balitsky មន្ត្រីជាន់ខ្ពស់ដែលតែងតាំងដោយទីក្រុងម៉ូស្គូ ក្នុងតំបន់ហ្សាប៉ូរីហ្សា បានប្រាប់ទីភ្នាក់ងារសារព័ត៌មានរដ្ឋរុស្ស៊ីក្នុងការអធិប្បាយដែលបានចេញផ្សាយនៅថ្ងៃចន្ទនេះថា៖«សត្រូវ ត្រូវបានបញ្ឈប់ ហើយការវាយបករបស់ពួកគេដែលត្រូវបានបំភាន់យ៉ាងខ្លាំងនោះ ត្រូវបានបញ្ឈប់ទាំងស្រុង»។

លោក Balitsky បាននិយាយថា ការប្រយុទ្ធតូចៗ កំពុងបន្តនៅជិតភូមិ Robotyne និងនៅជិតភូមិ Shcherbaky ដែលមានចម្ងាយប្រហែល ២២គីឡូម៉ែត្រ ទៅភាគពាយព្យ។