រដ្ឋមន្ត្រីក្រសួងដឹកជញ្ជូនហ្វីលីពីន នៅថ្ងៃចន្ទ (ទី៦ ខែវិច្ឆិកា) បានឲ្យដឹងថា ប្រទេសជប៉ុន កូរ៉េខាងត្បូង និងឥណ្ឌា បានស្នើផ្តល់ហិរញ្ញប្បទានដល់គម្រោងផ្លូវដែកហ្វីលីពីនចំនួន៣ ដែលមានតម្លៃជិត ៥ពាន់លានដុល្លារអាមេរិក បន្ទាប់ពីទីក្រុងម៉ានីល បានបដិសេធមិនទទួលយកប្រភពមូលនិធិរបស់ប្រទេសចិន កាលពីឆ្នាំមុន។

រដ្ឋមន្ត្រីក្រសួងដឹកជញ្ជូនលោក Jaime Bautista បាននិយាយថា រដ្ឋាភិបាលហ្វីលីពីន អាចជ្រើសរើសប្រទេសទាំង៣ សម្រាប់ជំនួយអភិវឌ្ឍន៍ផ្លូវការ (ODA) ដែលអាចនឹងកើតមាន។ លោកបន្តថា រដ្ឋាភិបាលក៏អាចនឹងផ្តល់ផងដែរនូវមូលនិធិមួយផ្នែកនៃគម្រោងផ្លូវដែក ឬស្វែងរកការវិនិយោគពីវិស័យឯកជន។

កាលពីឆ្នាំមុន ប្រធានាធិបតីហ្វីលីពីន លោក Ferdinand Marcos Jr បានបញ្ជាឲ្យមន្ត្រីចរចាឡើងវិញនូវកិច្ចព្រមព្រៀងប្រាក់កម្ចីជាមួយប្រទេសចិន ដែលត្រូវបានពិចារណា «ដកចេញ» បន្ទាប់ពីរដ្ឋាភិបាលចិនខកខានមិនអាចចាត់វិធានការ ចំពោះសំណើផ្តល់មូលនិធិនេះ។

ទិន្នន័យរបស់រដ្ឋាភិបាលបង្ហាញថា ពីការមានផ្លូវជាង ១.១០០គីឡូម៉ែត្រ មុនសង្គ្រាមលោកលើកទី២ ប្រទេសហ្វីលីពីនមានផ្លូវដែកប្រតិបត្តិការត្រឹមតែ ៧៧គីឡូម៉ែត្រប៉ុណ្ណោះ គិតត្រឹមឆ្នាំ២០១៦ ដែលនៅពីក្រោយមជ្ឈមណ្ឌលទីក្រុងផ្សេងទៀតនៅទូទាំងអាស៊ី។ លោក Marcos បានសន្យាធ្វើទំនើបកម្មប្រព័ន្ធផ្លូវដែករបស់ប្រទេស។ ការសាងសង់រថភ្លើងក្រោមដីដំបូងគេរបស់ហ្វីលីពីន ដែលទទួលបានកម្ចីពីសជប៉ុន កំពុងដំណើរការ ក្នុងតំបន់រដ្ឋធានី៕