ខណៈដែលខ្លួនចូលកាន់តំណែងជាប្រធានក្រុមប្រឹក្សាសន្តិសុខអង្គការសហប្រជាជាតិ (UNSC) ក្រសួងការបរទេសចិន បាននិយាយនៅថ្ងៃចន្ទនេះថា ប្រទេសចិន នឹងប្រឹងប្រែងឲ្យអស់ពីសមត្ថភាព ដើម្បីស្តារសន្តិភាព នៅក្នុងទឹកដីប៉ាឡេស្ទីន ដោយសារភាពតានតឹងកាន់តែខ្លាំងឡើង នៅមជ្ឈិមបូព៌ា។

លោក Wang Wenbin អ្នកនាំពាក្យក្រសួងការបរទេស បានថ្លែងប្រាប់សន្និសីទសារព័ត៌មានជាប្រចាំថា៖«ប្រទេសចិននឹងប្រឹងប្រែងឲ្យអស់ពីសមត្ថភាព ដើម្បីលើកទឹកចិត្តក្រុមប្រឹក្សាសន្តិសុខឲ្យបំពេញភារកិច្ចរបស់ខ្លួន ដើរតួនាទីរបស់ខ្លួន បង្កើតការឯកភាពគ្នា និងចាត់វិធានការប្រកបដោយការទទួលខុសត្រូវ និងប្រកបដោយអត្ថន័យឲ្យបានឆាប់តាមដែលអាចធ្វើទៅបាន ដើម្បីបន្ធូរបន្ថយវិបត្តិបច្ចុប្បន្ន និងការពារសុវត្ថិភាពរបស់ជនស៊ីវិល ដើម្បីស្តារសន្តិភាពឡើងវិញ»។

សេចក្តីថ្លែងការណ៍របស់ប្រទេសចិន បានកើតឡើង ខណៈដែលអ៊ីស្រាអែល ចាប់ផ្តើមវាយលុកផ្នែកយោធារបស់ខ្លួនប្រឆាំងនឹងក្រុមឥស្លាមប៉ាឡេស្ទីនហាម៉ាស(Hamas)។

ប្រទេសចិន បានចូលកាន់តំណែងជាប្រធានប្តូរវេននៃ UNSC កាលពីសប្តាហ៍មុន។

លោក Zhang Jun តំណាងអចិន្ត្រៃយ៍របស់ប្រទេសចិនប្រចាំនៅអង្គការសហប្រជាជាតិ បាននិយាយថា ជម្លោះនៅមជ្ឈិមបូព៌ា គឺជារបៀបវារៈរបស់ក្រុមប្រឹក្សាសន្តិសុខ នៅក្នុងខែវិច្ឆិកា នេះបើយោងតាមប្រព័ន្ធផ្សព្វផ្សាយរដ្ឋ។