គិលានុបដ្ឋាយិកាហ្គាហ្សាមួយរូប បានរំឭកពីបទពិសោធន៍របស់គាត់ ពេលក្បួនរថយន្តគិលានសង្រ្គោះ ដែលគាត់ស្ថិតនៅក្នុង បានក្លាយជាគោលដៃនៃការវាយប្រហារតាមច្រកអាកាសឥតឈប់ឈររបស់អ៊ីស្រាអែល ។ 

គិលានុបដ្ឋាយិកា Abdelsalam Barakaat និយាយថា នៅតាមផ្លូវ មានរថយន្តគិលានសង្រ្គោះ ៦គ្រឿង ដឹកអ្នកជំងឺ ១១នាក់ ដែលស្ថិតក្នុងស្ថានភាពធ្ងន់ធ្ងរខ្លាំងបំផុត មិនដឹងថារស់ ឬស្លាប់នោះទេ ។ ជីវិតរបស់ពួកគេស្ថិតក្នុងការគំរាមកំហែង ។ 

លោកថា ពេលពួកយើងវិលត្រឡប់មកកាន់មន្ទីរពេទ្យ Al Shifa al Tobbi វិញ រថយន្តក្រោយគេ បានក្លាយជាគោលដៅនៃការវាយប្រហារ ។ 

ក្រុមអាជ្ញាធរសុខភាពប៉ាឡេស្ទីននៅតំបន់ហ្គាហ្សាគ្រប់គ្រងដោយក្រុមហាម៉ាស់ និយាយថា អ៊ីស្រាអែលបានវាយប្រហារលើក្បួនរថយន្តគិលានសង្រ្គោះ កាលពីថ្ងៃ សុក្រ ទី ៣ ខែវិច្ឆិកា ពេលដែលពួកគេធ្វើដំណើរចេញពីទីក្រុង Al Shifa ស្ថិតនៅក្នុងទីក្រុងហ្គាហ្សា ទៅទិសខាងត្បូង ដើម្បីជម្លៀសមនុស្សរងរបួស ។ 

លោក Ashraf al-Qidra គឺជាអ្នកនាំពាក្យរបស់ក្រសួងសុខាភិបាលតំបន់ហ្គាហ្សា និយាយថា ក្រុមកាន់កាប់ បានវាយប្រហារមកលើក្បួនរថយន្តគិលានសង្រ្គោះរបស់ពួកគេ នៅលើទីតាំងខាងក្រៅមន្ទីរពេទ្យ Al Shifa ។ 

លោកថា ក្បួនរថយន្តនេះ បានក្លាយជាគោលដៅទាំងនៅមាត់ច្រកចេញរបស់មន្ទីរពេទ្យ និងនៅទីលានចតុរង្គ Ansar ដែលមានចម្ងាយ ១គ.ម ឆ្ងាយពីគ្នា ។ 

ដោយឡែក អ្នកនាំពាក្យយោធាអ៊ីស្រាអែល និយាយថា ពួកគេកំពុងពិនិត្យមើលសេចក្តីរាយការណ៍មួយនេះ ។ អ៊ីស្រាអែល បានចោទប្រកាន់ក្រុមហាម៉ាស់ថា បានលាក់បាំងមជ្ឈមណ្ឌលបញ្ជាការ និងច្រកចូលផ្លូវក្រោមដីនៅក្នុងមន្ទីរពេទ្យ Al Shifa ដែលក្រុមហាម៉ាស់ និងមន្ទីរពេទ្យ ធ្វើការច្រានចោលទាំងស្រុក ៕