កងទ័ពការពារអ៊ីស្រាអែល បាននិយាយនៅថ្ងៃចន្ទនេះថា យន្តហោះចម្បាំងអ៊ីស្រាអែល បានវាយប្រហារលើគោលដៅក្រុមហាម៉ាស់ ៤៥០កន្លែងនៅក្នុងតំបន់ហ្គាហ្សា ហើយទាហានពួកគេរឹបអូសបានទីតាំងក្រុមជីវពលមួយកន្លែង ក្នុងរយៈពេល ២៤ម៉ោងចុងក្រោយនេះ ស្របពេលដែលក្រសួងសុខាភិបាលនៅក្នុងតំបន់បិទច្រករបស់ប៉ាឡេស្ទីនមួយនេះ និយាយថា ការវាយប្រហារតាមច្រកអាកាស បានសម្លាប់មនុស្សរាប់សិបនាក់ ហើយជនប៉ាឡេស្ទីន ស្វែងរកទីជម្រកនៅជំរំ Khan Younis ។ 

អ្នកសារព័ត៌មានម្នាក់របស់ទីភ្នាក់ងារព័ត៌មានរ៉យទ័រ នៅតំបន់ហ្គាហ្សាស្រ្ទីប បាននិយាយរៀបរាប់ថា ការទម្លាក់គ្រាប់បែកនៅពេលយប់ ពីលើអាកាស ពីដីគោក និងចេញពីសមុទ្រ គឺស្ថិតនៅក្នុងចំណោមការវាយប្រហារដ៏ខ្លាំងក្លាបំផុតចាប់តាំងពីអ៊ីស្រាអែល បើកការវាយលុករបស់ខ្លួន ជាការឆ្លើយតបនឹងការវាយប្រហារដ៏គួរភ្ញាក់ផ្អើលរបស់ក្រុមជីវពលហាម៉ាស់ លើតំបន់ភាគខាងត្បូងអ៊ីស្រាអែល កាលពីរយៈពេល ១ខែមុន ។ 

ក្រុមមន្រ្តីសុខាភិបាលនៅតំបន់ហ្គាហ្សាគ្រប់គ្រងដោយក្រុមហាម៉ាស់ និយាយថា ជនប៉ាឡេស្ទីនជាង ៩.៧៧០នាក់ ត្រូវបានសម្លាប់នៅក្នុងសង្រ្គាមដែលបានចាប់ផ្តើមឡើង ពេលដែលក្រុមជីវពលហាម៉ាស់ បើកការវាយប្រហារដ៏គួរភ្ញាក់ផ្អើលលើតំបន់ភាគខាងត្បូងអ៊ីស្រាអែល កាលពីថ្ងៃទី ៧ ខែតុលា ដោយបានសម្លាប់មនុស្សជាង ១.៤០០នាក់ និងបានចាប់ចំណាប់ថ្នូរជាង ២៤០នាក់ ។ 

ការច្រានចោលការអំពាវនាវឲ្យមានបទឈប់បាញ់រហូតដល់ចំណាប់ខ្មាំងត្រូវបានដោះលែងអស់ អ៊ីស្រាអែលប្រឈមនឹងសំពាធកាន់តែខ្លាំង ឲ្យជៀសផុតគ្រោះថ្នាក់ដល់ជនស៊ីវិល អំឡុងការវាយប្រហាររបស់ពួកគេ ស្របពេលដែលសហរដ្ឋអាមេរិក ព្យាយាមកាត់បន្ថយហានិភ័យដែលអាចបង្កឲ្យកើតមានជម្លោះធំ ៕