ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា បច្ចុប្បន្ននេះ ក្រសួង​បានកំពុងពិគ្រោះយោបល់ និងសហការជាមួយដៃគូសង្គមនានា សំដៅដាក់​ចេញ​នូវ​យន្តការ​វាយ​តម្លៃ និងកំណត់លក្ខណៈវិនិច្ឆ័យ ដើម្បីប្រកាសនូវយុទ្ធនាការប្រឡងប្រណាំងយក “សហ​គ្រាស​មួយ ជាសហគមន៍សុខសាន្តមួយ” ចាប់ពីឆ្នាំ២០២៤តទៅ។

ក្នុងកម្មវិធីចុះជួបសំណេះសំណាលជាមួយកម្មករនិយោជិតចំនួនជាង ១៥,០០០នាក់ នៅ​តំបន់​សេដ្ឋកិច្ច​ពិសេសមកពីរោងចក្រសហគ្រាសនានា ស្ថិតនៅស្រុកព្រៃនប់ ខេត្តព្រះសីហនុ ក្រោម​អធិប​តី​ភាព​សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី៧ វិច្ឆិកា ឆ្នាំ​២០២៣​នេះ ​ឯកឧត្តមរដ្ឋមន្រ្តី ក្រសួងការងារ​បានមានប្រសាសន៍ថា យុទ្ធនាការនេះ បង្កើត​ឡើង​ដើម្បី​ជំរុញ​ឲ្យមានចលនាមួយ នឹងធ្វើឲ្យមានភាពសុខដុមរមនា និងប្រាស្រ័យទំនាក់ទំនងគ្នាល្អ រវាង​កម្មករនិយោជិត និងជាមួយនិយោជក។ ជាពិសេស ដើម្បីពង្រឹងកិច្ចសហប្រតិបត្តិការ និង​ប្រសិទ្ធភាព​គម្រោងរោងចក្រកាន់តែប្រសើរនៅកម្ពុជា របស់អង្គការអន្តរជាតិខាងការងារ ហៅកាត់ ILO-BFC ផងដែរ។

សូមបញ្ជាក់ថា យុទ្ធនាការការប្រឡងប្រណាំងយក “សហគ្រាសមួយ ជា​សហគមន៍​សុខ​សាន្ត​មួយ​”នេះ គឺក្នុងចំណោមការងារអាទិភាពចំនួន​ ៦ចំណុច របស់ប្រមុខរាជរដ្ឋាភិបាល បាន​ប្រគល់​ឲ្យ​ក្រសួង​ការងារ និងបណ្តុះបណ្តាលវិជ្ជាជីវៈប្រតិបត្តិការនៅឆ្នាំ២០២៣ ដើម្បី​លើក​កម្ពស់​លក្ខ​ខណ្ឌ​ការងារ​កាន់​តែ​ល្អ​ប្រសើរ និង​ការ​លើក​កម្ពស់​ការ​ប្រកួត​ប្រជែង​ក្នុង​ទីផ្សារ​តំបន់​ប្រកប​ដោយ​ប្រសិទ្ធភាព​៕ អត្ថបទ៖ ឈិត បូរ៉ាវី