ព្រះសីហនុ ៖ ខណៈឈ្លៀតពេលវេលាដ៏មមាញឹក នាយប់ថ្ងៃទី០៦ វិច្ឆិកា ឆ្នាំ២០២៣ លោកកុយ សាមឺឌី អភិបាលរងស្រុកស្ទឹងហាវ បានឈ្លៀតចុះជួប និងសួរសុខទុក្ខជាមួយ ប្អូនៗជាបេក្ខជន បេក្ខនារី​ប្រឡងសញ្ញាបត្រមធ្យមសិក្សាទុតិយភូមិ ( បាក់ឌុប ) ដើម្បីសំណេះសំណាល និងជា​ការ​លើកទឹកចិត្តដល់ពួកគាត់ សម្រាប់ការប្រឡង ដែលនឹងបញ្ចប់ទៅត្រឹមល្ងាចថ្ងៃទី០៧ វិច្ឆិកា ឆ្នាំ​២០២៣ ។

លោក កុយ សាមឺឌី ឱ្យដឹងថា បេក្ខជនប្រឡងចំនួន ១៣៧នាក់ គឺជាសិស្សានុសិស្សមក​ពី​វិទ្យាល័យ​ស្ទឹងហាវ និងវិទ្យាល័យកែវផុស ហើយពួកគេ​ត្រូវ​ប្រឡង​នៅ​មណ្ឌល​វិទ្យាហ៊ុនសែន​វាលរេញ ដែលស្ថិតក្នុងស្រុកព្រៃនប់ ។ ដោយសារតែលំនៅឋាន និងមណ្ឌលប្រឡង មានចម្ងាយ​ឆ្ងាយ​ពី​គ្នាដោយត្រូវធ្វើដំណើរឆ្លងពីស្រុកមួយទៅស្រុកមួយ ទើប ឯកឧត្តមគួច ចំរើន អភិបាល​ខេត្ត​ព្រះសីហនុ បានរៀបចំជួលបន្ទប់ស្នាក់នៅសម្រាប់បេក្ខជនប្រឡងខាងលើ សម្រាប់​ការ​ស្នាក់​នៅរយៈ​ពេល២យប់ ដោយឥតគិតថ្លៃ និងមានរៀបចំបាយទឹកជូនពួកគាត់ផងដែរ ។

ក្នុងការឱកាសចុះសួរសុខទុក្ខប្អូនៗ បេក្ខជន និងបេក្ខនារី ខាងលើទាំងយប់ហើយនោះ លោក​អភិបាល​រងស្រុកស្ទឹងហាវ បានណែនាំដល់ប្អូនៗ ត្រូវខិតខំព្យាយាម​យក​ចិត្ត​ទុក​ដាក់​អោយ​បាន​ខ្ពស់ ក្នុងការប្រលងនៅពេលនេះ ហើយការប្រលងនៅពេលនេះ ជាមាគ៌ា​ដ៏សម្ខាន់​ដែល​ជួយ​ចម្លង​ប្អូន​ៗ​ទាំងអស់គ្នា អោយបន្តទៅរកភាពជោគជ័យនៅពេលខាងមុខបន្តទៀត ដើម្បីជា​ថ្នាល​សម្រាប់​ជីវិត​ដ៏រ៉ុងរឿងរបស់ខ្លួនឯង ក៏ដូចជាជាថ្នាលនាំខ្លួនឯងអោយក្លាយខ្លួនទៅជា យុវជន​យុវសិស្ស​​ដ៏ឆ្នើម ដែលសាកសមជាសរសេរទ្រូងដ៏រឹងមាំរបស់ប្រទេសជាតិរបស់យើង នាថ្ងៃ​អនាគត​ផងដែរ ។

ក្រោយការសំណេះសំណាលរួច លោកអភិបាលរងស្រុក ក៏បានឧបត្ថម្ភទឹកសុទ្ធ និងភេសជ្ជៈ​មួយ​ចំនួន សម្រាប់ប្អូនៗបេក្ខជន យកទៅទទួលទានផងដែរ ៕ លីហេង