ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១១ ខែវិច្ឆិកាខាងមុខនេះ នឹង​រៀបចំ​ពិធី​ចុះ​អនុស្សរណៈ​យោគយល់ (MOU) ជាមួយតំណាងវិស័យឯកជនចំនួន ១៨សមាគម ដើម្បី​ឱ្យ​សិក្ខាកាម និងសិស្ស ដែលរៀនជំនាញវិជ្ជាជីវៈនានា បានទៅហាត់ការ និងធ្វើកម្មសិក្សា។ បន្ថែម​ពី​នេះ​ទៀ​ត ដើម្បីលើកកម្ពស់ដល់ការបណ្តុះបណ្តាលជំនាញកាន់តែមានប្រសិទ្ធិភាពខ្ពស់។ នេះ​បើ​តាម​ការបញ្ជាក់របស់ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ។

ឯកឧត្តម ហេង សួរ ថ្លែងក្នុងកម្មវិធីចុះជួបសំណេះសំណាលជាមួយកម្មករនិយោជិត នៅ​តំបន់​សេដ្ឋកិច្ច​ពិសេស ខេត្តព្រះសីហនុ ក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋ​មន្ត្រី នៃ​កម្ពុជា នៅព្រឹកថ្ងៃទី៧ វិច្ឆិកា ឆ្នាំ២០២៣នេះថា តំណាងវិស័យឯកជនចំនួន ១៨ សមាគម ដែល​ក្រសួងការងារនឹងត្រូវចុះអនុស្សរណៈយោគយល់ (MOU) មានដូចជា សភាពាណិជ្ជកម្ម , សហព័ន្ធ​និយោជក និងសមាគមពាណិជ្ជកម្មកម្ពុជា (CAMFEBA) , សមាគមវាយនភណ្ឌ សម្លៀក​បំពាក់ ផលិតផលស្បែកជើង និងផលិតផលធ្វើដំណើរ ,សមាគមអ្នកសាសង់កម្ពុជា , សមាគម​ទេសចរណ៍ , សហព័ន្ធចុងភៅកម្ពុជា និងសមាគមសហគ្រិនស្រ្តីកម្ពុជាដើម ដើម្បី​សមាគម​ទាំង​អស់នេះ ជំរុញដល់សមាជិករបស់ខ្លួនផ្តល់ឱកាសហាត់ការ និងកម្មសិក្សាដល់សិស្ស ដែល​នឹងចូលរៀនវគ្គបណ្តុះបណ្តាលនាពេលខាងមុខ។

ឯកឧត្តមថ្លែងថា តាមរយៈកិច្ចសហប្រតិបត្តិការនេះ គឺដើម្បីធានាថា សិស្សមិន​ត្រឹមតែអា​ច​អនុវ​ត្ត​នូវ​រោង​ជាងនៅសាលានោះទេ ប៉ុន្តែអាចអនុវត្តជាក់ស្តែង និងធ្វើការជាក់​ស្តែង​នៅ​វិស័យ​ឯកជន​តែ​ម្តង ដែលនឹងផ្តល់ឲ្យវិស័យឯកជននូវឱកាស ដើម្បីពិនិត្យជ្រើសរើស ដែលបង​ប្អូន​ជា​សិស្ស​ទាំង​អស់​នោះ​អាចចូលធ្វើការនៅក្រោយចប់វគ្គតែម្តង។

ឯកឧត្តមរដ្ឋមន្រ្តី បានឲ្យដឹងទៀតថា ក្រសួង​ក៏​បាន​រៀបចំ​កម្ម​វិធី​បណ្តុះបណ្តាល​ដែល​មាន​ភាព​បត់​បែន​ដល់​យុវជន ១,៥ លាននាក់ក្នុងនោះនឹងមានវេនយប់ និងវេនចុងសប្តាហ៍ ដែលអា​ច​ផ្តល់​ជំរើស សម្រាប់បងប្អូនដែលកំពុងធ្វើការពេលបច្ចុប្បន្ននេះ អាចធ្វើការបណ្តើរ និងអាច​ចូល​រៀន​បណ្តើរ​ផង​ដែរ។

 សូមជម្រាបថា នៅថ្ងៃទី១៤ ខែវិច្ឆិកា ឆ្នាំ២០២៣ខាងមុខនេះ ប្រមុខរាជរដ្ឋាភិបាលកម្ពុជា នឹងប្រកាសដាក់ឲ្យដំណើរការជាផ្លូវការកម្មវិធីបណ្តុះបណ្តាលជំនាញវិជ្ជាជីវៈដល់យុវជនក្រីក្រ និង​ងាយ​រងគ្រោះចំនួន ១,៥ លាននាក់ ដើម្បីឲ្យកម្ពុជាមានធនធានមនុស្ស ក្នុងការ​បម្រើ​សេចក្តី​ត្រូវការ និងការវិនិយោគ ដែលមកពីក្រៅប្រទេស។ កម្មវិធីនេះដែរយុវជនមកពីគ្រួសារក្រីក្រ និង​គ្រួសារ​ងាយ​រងហានិភ័យ អាចចូលរៀនដោយមិនបង់ប្រាក់ និងទទួលបាន​ប្រាក់​ឧបត្ថម្ភ​បន្ថែម​ពី​រាជរដ្ឋាភិបាល​ផងដែរ។ សម្រាប់មុខជំនាញដែលនឹងត្រូវផ្តល់ជូន មានចំនួនជាង៦០ ជំនាញ ក្នុងវិស័យ​ដូចជា៖ សំណង់ , អគ្គីសនី អេឡិចត្រូនិច កម្មន្តសាល មេកានិច កសិកម្ម និងកសិ ឧស្សាហកម្ម ជួសជុលរថយន្ត តំឡើងប្រព័ន្ធទឹក ។ល៕ អត្ថបទ៖ ឈិត បូរ៉ាវី