គុយបា ៖ ប្រទេសគុយបាបានរៀបចំពិព័រណ៍ពាណិជ្ជកម្មជាមួយក្រុមហ៊ុនជាង ៨០០ក្រុមហ៊ុន មកពីជាង ៦០ ប្រទេស កាលពីថ្ងៃចន្ទ (ទី៦ ខែវិច្ឆិកា) ខណៈដែលប្រទេសនេះ បានបញ្ចុះបញ្ចូលឲ្យមានការវិនិយោគថ្មីជាច្រើន ដោយមើលទៅហាក់មិនខ្វល់នឹងទណ្ឌកម្មរបស់សហរដ្ឋអាមេរិក ដែលបានបន្លាចក្រុមហ៊ុនបរទេសជាយូរមកហើយមិនឲ្យពាក់ព័ន្ធជាមួយប្រទេសកោះ ដែលគ្រប់គ្រងដោយរបបកុម្មុយនីស្តមួយនេះ។

គុយបាបានស្តីបន្ទោសថា មកពីការរារាំងពាណិជ្ជកម្មរបស់សហរដ្ឋអាមេរិក ក្នុងសម័យសង្គ្រាមត្រជាក់ និងជំងឺរាតត្បាតកូវីដ-១៩ ទើបធ្វើឲ្យប៉ះពាល់ដល់វិស័យទេសចរណ៍ និងឧស្សាហកម្មក្នុងស្រុករបស់ខ្លួន ដោយធ្វើឲ្យបាត់បង់សាច់ប្រាក់ ដែលខ្លួនត្រូវការ សម្រាប់ការនាំចូលទំនិញជាមូលដ្ឋាន និងធ្វើឲ្យការវិនិយោគបរទេសកាន់តែមានសារៈសំខាន់។

សហរដ្ឋអាមេរិក បាននិយាយជាយូរមកហើយថា ការដាក់បម្រាមពាណិជ្ជកម្មរបស់ខ្លួននេះ គឺសំដៅលើការលើកកម្ពស់ «សិទ្ធិមនុស្ស និងសេរីភាពជាមូលដ្ឋាននៅក្នុងប្រទេសគុយបា» ជាគោលនយោបាយ ដែលស្ទើរតែមិនមានការផ្លាស់ប្ដូរទាល់តែសោះ ក្នុងរយៈពេលជាច្រើនទសវត្សរ៍មកហើយ។

កាលពីខែកញ្ញា រដ្ឋបាលរបស់ប្រធានាធិបតី លោក Joe Biden បានលើកឡើងថា ខ្លួននឹងបង្ហាញវិធានការនិយ័តកម្មថ្មី ដើម្បីគាំទ្រដល់អាជីវកម្មឯកជនថ្មីរបស់ប្រទេសគុយបា ប៉ុន្តែច្បាប់ទាំងនោះមិនទាន់ចូលជាធរមាននៅឡើយទេ៕