​បារាំង៖ លោក​ប្រធានាធិបតី​បារាំង Emmanuel Macron ត្រូវ​បាន​បុរស​ម្នាក់​ទះកំផ្លៀង​កាលពី​ថ្ងៃ​អង្គារ ​អំឡុង​ទស្សនកិច្ច​ទៅកាន់​ទីក្រុង​តូច​មួយ​ក្នុង​ប្រទេស​បារាំង​ភាគ​ខាង​ត្បូង​។ ​​ការិយា​ល័យ​របស់​លោក Macron បាន​បញ្ជាក់​ក្នុង​រូបភាព​វីដេអូ ​ដែលចែករំលែក​យ៉ាង​ទូលំទូលាយ​លើ​បណ្ដាញ​សង្គម​។​

លោក​ប្រធានាធិបតី​បារាំង​ត្រូវ​បាន​ស្វាគមន៍​ ដោយ​សាធារណជន​ជាច្រើន​ដែល​កំពុង​រង់ចាំ​រូបលោក​ នៅ​ពីក្រោយ​រនាំង​ក្នុង​ទីក្រុង Tain-l’Hermitage បន្ទាប់ពី​លោក​បាន​អញ្ជើញ​ទៅ​ពិនិត្យ​មើល​សាលា​វិទ្យាល័យ​មួយ​ ដែល​កំពុង​បណ្ដុះបណ្ដាល​សិស្ស​ធ្វើការ​ក្នុង​សណ្ឋាគារ ​និង​ភោជនីយដ្ឋាន​នានា​។ អង្គរក្ស​ម្នាក់​ដែល​ឈរ​នៅ​ពីក្រោយ​លោក Macron បាន​លើក​ដៃ​បាំង​ការពារ​លោក​ប្រធានាធិបតី ប៉ុន្តែ​យឺត​ពេល​ក្នុង​ការ​បញ្ឈប់​ការ​ទះកំផ្លៀង។​

​ក្រោយមក​អង្គរក្ស​លោក​បាន​ចាប់​អោប​ទាញ​លោក​ប្រធានាធិបតី​ចេញ​។​ លោក Macron ពុំបាន​និយាយ​អ្វី​ទេ​ទាក់ទង​នឹង​ឧបទ្ទវ​ហេតុនេះ​។ សារ​ព័ត៌មាន​បារាំង BFMTV បាន​និយាយ​ថា នគរបាលបាន​ឃុំខ្លួន​មនុស្ស​ ២​នាក់ ម្នាក់​គឺ​បុរស​ដែល​បាន​ទះកំផ្លៀង​លោក Macron និង​ម្នាក់ទៀតជា​បុរស​ដែល​បាន​ថត​វីដេអូ​នេះ៕

អត្ថបទ៖ សុខមាន