អុីស្រាអែល ៖ នៅថ្ងៃអង្គារនេះ ក្រុមជួយសង្រ្គោះ និងប្រជាពលរដ្ឋ បានស្វែងរកនៅក្រោមគំនរបាក់បែកអគារ ក្រោយការវាយប្រហារតាមច្រកអកាសរបស់អ៊ីស្រាអែលត្រូវចំសង្កាត់ Al-Qarara ស្ថិតក្នុងទីក្រុង Khan Younis តំបន់ហ្គាហ្សា ។ 

 ក្រុមមន្រ្តីសុខាភិបាល និយាយថា ជនប៉ាឡេស្ទីនយ៉ាងហោច ២៣នាក់ ត្រូវបានសម្លាប់អំឡុងការវាយប្រហារ ២លើកដាច់ដោយឡែក នៅព្រឹកថ្ងៃអង្គារនេះ ក្នុងទីក្រុង Khan Younis និងទីក្រុង Rafah នៅភាគខាងត្បូងតំបន់ហ្គាហ្សា ។ 

 លោក Abu Jihad គឺជាអ្នកស្រុកមួយរូបដែលរស់នៅក្នុងសង្កាត់ Al-Qarara និយាយថា ពួកគេកំពុងដេកលង់លក់ ពេលដែលពួកគេឮសំឡេងធ្លាក់មីស៊ីល ។ ពួកគេទាំងអស់គឺជាក្មេងៗ ហើយអរគុណព្រះដែលពួកគេមានសុវត្ថិភាព ។ 

 លោក Jihad បន្តថា ពួកយើងហត់នឿយណាស់ ពួកយើងត្រូវបានគេបំផ្លាញ មនុស្សត្រូវបានគេបំផ្លាញ ជីវិតរបស់ពួកគេត្រូវបានបំផ្លាញ ក្មេងៗត្រូវបានបំផ្លាញ ស្រ្តី និងកុមារ បានស្លាប់ ពួកគេទាំងអស់ បានស្លាប់គ្មាននរណាម្នាក់នៅសេសសល់នោះទេ ក្នុងតំបន់ហ្គាហ្សា ។ 

 លោកនិយាយទៀតថា អរគុណព្រះដែលពួកយើងមានសុវត្ថិភាព ប៉ុន្តែខ្ញុំហ៊ានស្បថថា ពួកយើងរង់ចាំតែសេចក្តីស្លាប់មកដល់តែប៉ុណ្ណោះ វាប្រសើរជាងរស់ ពួកយើងរង់ចាំសេចក្តីស្លាប់គ្រប់ពេល វាគ្រាន់តែជាសេចក្តីស្លាប់ដែលពន្យាពេលប៉ុណ្ណោះ ។ 

 សូមបញ្ជាក់ថា អ៊ីស្រាអែល បានទម្លាក់គ្រាប់បែកលើតំបន់បិទច្រកមួយនេះ ចាប់តាំងពីក្រុមហាម៉ាស់ វាយឆ្មក់តំបន់ភាគខាងត្បូងប្រទេសអ៊ីស្រាអែល កាលពីរយៈពេល ១ខែមុន ពេលដែលក្រុមសកម្មប្រយុទ្ធរបស់ពួកគេ បានសម្លាប់មនុស្សជាង ១.៤០០នាក់ និងចាប់ចំណាប់ថ្នូរជាង ២៤០នាក់ ។ 

 ក្រុមមន្ត្រីសុខាភិបាលតំបន់ហ្គាហ្សា និយាយថា ការវាយប្រហាររបស់អ៊ីស្រាអែល បានសម្លាប់ជនប៉ាឡេស្ទីនជាង ១ម៉ឺននាក់ ដែលរួមទាំងកុមារ ៤.១០០នាក់ផងដែរ ៕