ភ្នំពេញ៖ នៅថ្ងៃទី៧ ខែវិច្ឆិកា ឆ្នាំ២០២៣ ឯកឧត្តម កែវ រ៉េមី ទេសរដ្ឋមន្រ្តី និងជាប្រធានគណៈកម្មាធិការសិទ្ធិមនុស្សកម្ពុជា បានទទួលជួបលោកបណ្ឌិត Will Parks តំណាងអង្គការយូនីសេហ្វប្រចាំកម្ពុជា លោកស្រី Ann Marie Skelton ប្រធានគណៈកម្មាធិការទទួលបន្ទុកសិទ្ធិកុមារនៃអង្គការសហប្រជាជាតិ និងលោកស្រី Sopio Kiladze អនុប្រធានគណៈកម្មាធិការទទួលបន្ទុកសិទ្ធិកុមារនៃអង្គការសហប្រជាជាតិ និងសហការី ដើម្បីពិភាក្សាការងារលើបញ្ហាសិទ្ធិមនុស្ស និងកុមារ។

ជំនួបនេះ រៀបចំឡើងក្នុងគោលបំណងពិភាក្សាទៅលើរបៀបវារៈសំខាន់ចំនួនពីរគឺ៖ ទី១ ការបង្កើតស្ថាប័នជាតិសិទ្ធិមនុស្ស (NHRI) ក្នុងប្រទេសកម្ពុជា និងទី២ ការពិភាក្សាលើប្រធានបទដែលទាក់ទងនឹងកុមារ មានជាអាទិ៍៖ សេចក្តីព្រាងច្បាប់ស្តីពីកិច្ចការពារកុមារ ការផ្តល់សច្ចាប័នលើពិធីសារបន្ថែមទី៣ស្តីពីនីតិវិធីបណ្តឹងនៃអនុសញ្ញាស្តីពីសិទ្ធិកុមារ ការកេងប្រវ័ញ្ចលើកុមារ និងពលកម្មកុមារ។

 ឆ្លើយតបទៅនឹងការបង្កើតស្ថាប័នជាតិសិទ្ធិមនុស្សកម្ពុជា ឯកឧត្តម កែវ រ៉េមី បញ្ជាក់ថា សេចក្តីព្រាងច្បាប់នេះ គណៈកម្មាធិការសិទ្ធិមនុស្សកម្ពុជា បានសហការជាមួយការិយាល័យឧត្តមស្នងការទទួលបន្ទុកសិទ្ធិមនុស្សប្រចាំកម្ពុជា (OHCHR) ដែលជាសហប្រធាន រៀបចំកិច្ចពិគ្រោះយោបល់ចំនួន ៣២លើក ដែលមានទាំងថ្នាក់តំបន់អាស៊ាន ថ្នាក់ជាតិ និងថ្នាក់ក្រោមជាតិ ជាមួយភាគីពាក់ព័ន្ធ ដែលរួមមានទាំងតំណាង NHRI ក្នុងតំបន់ តំណាងវេទិកាអាស៊ីប៉ាស៊ីហ្វិកនៃ NHRI (APF) ក្រុមអង្គការសង្គមស៊ីវិល សហជីព គ្រឹះស្ថានឧត្តមសិក្សា មេធាវី ប្រព័ន្ធផ្សព្វផ្សាយ និងក្រុមជនជាតិដើមភាគតិច។ គ.ស.ម.ក. បានបញ្ជូនសេចក្ដីព្រាងច្បាប់នេះទៅទីស្ដីការគណៈរដ្ឋមន្រ្តី កាលពីថ្ងៃទី១៩ ខែកញ្ញា ឆ្នាំ២០២៣។

 ឯកឧត្តម កែវ រ៉េមី បានលើកឡើងថា នៅក្នុងអាណត្តិទី៧នេះ រាជរដ្ឋាភិបាលកម្ពុជា នៅតែប្ដេជ្ញាបន្ដថែរក្សាសន្ដិភាព ដែលជាមូលដ្ឋានគ្រឹះក្នុងការធានានូវសិទ្ធិមនុស្ស ជាពិសេសសិទ្ធិរស់រានមានជីវិត និងលើកកម្ពស់ការការពារសិទ្ធិស្រ្តីនិងសិទ្ធិកុមារ។ ទន្ទឹមនេះ រាជរដ្ឋាភិបាល នីតិកាលទី៧ នៃរដ្ឋសភា បានផ្ដោតជាអាទិភាពលើវិស័យសង្គមកិច្ច ដែលជួយទៅលើជនក្រីក្រ និងងាយរងគ្រោះ រួមទាំងស្ដ្រីមានផ្ទៃពោះ ជាពិសេសលើកម្មវិធីគាំពារសង្គមផ្សេងៗ មានវិស័យអប់រំ សុខាភិបាល និងសង្គមកិច្ច តាមរយៈការបង្កើនថវិកាជាតិសម្រាប់វិស័យទាំងនេះក្នុងឆ្នាំ២០២៤ ដែលរដ្ឋសភាជាតិនឹងអនុម័តក្នុងពេលខាងមុខនេះ។

 ចំពោះរបៀបវារៈទី២ ដែលពាក់ព័ន្ធនឹងសេចក្តីព្រាងច្បាប់ស្តីពីកិច្ចការពារកុមារ ការផ្តល់សច្ចាប័នលើពិធីសារបន្ថែមទី៣ស្តីពីនីតិវិធីបណ្តឹង ការកេងប្រវ័ញ្ចលើកុមារ និងពលកម្មកុមារ ឯកឧត្តម កែវ រ៉េមី បានជម្រាបទៅកាន់ប្រតិភូទទួលបន្ទុកសិទ្ធិកុមារនៃអង្គការសហប្រជាជាតិថា ការងារទាំងនេះគឺស្ថិតនៅក្រោមសមត្ថកិច្ចរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា។ 

ឆ្លើយតបនឹងបញ្ហានេះ គណៈប្រតិភូនៃគណៈកម្មាធិការទទួលបន្ទុកសិទ្ធិកុមារនៃអង្គការសហប្រជាជាតិ យល់ឃើញថារាល់ការងារអនុសញ្ញា កតិកាសញ្ញាអន្តរជាតិនានាដែលពាក់ព័ន្ធនឹងសិទ្ធិកុមារ សិទ្ធិស្រ្តី សិទ្ធិជនមានពិការភាព និងការប្រឆាំងទារុណកម្មជាដើម គឺស្ថិតនៅក្រោមវិស័យសិទ្ធិមនុស្ស ព្រោះការងារទាំងនេះពាក់ព័ន្ធនឹងតួនាទីនិងភារកិច្ចរបស់គណៈកម្មាធិការនេះ។ 

ជាមួយគ្នា ឯកឧត្តម កែវ រ៉េមី មានប្រសាសន៍ថា គណៈកម្មាធិការសិទ្ធិមនុស្សកម្ពុជានឹងខិតខំប្រឹងប្រែងធ្វើការសហការបន្តទៀតជាមួយនឹងក្រសួងពាក់ព័ន្ធដើម្បីពិនិត្យមើលលទ្ធភាពនិងពិភាក្សាលើកត្តាផ្សេងៗ ទាក់ទងនឹងសំណើរបស់គណៈ កម្មាធិការទទួលបន្ទុកសិទ្ធិកុមារនៃអង្គការសហប្រជាជាតិ ៕ ដោយ ៖ ឧត្ដម