អាហ្វ្រិកខាងត្បូង ៖ អាហ្វ្រិកខាងត្បូង នឹងកោះហៅឲ្យក្រុមមន្រ្តីការទូតរបស់ខ្លួន វិលត្រឡប់ពីប្រទេសអ៊ីស្រាអែលវិញ ស្របពេលដែលគ្រោះថ្នាក់កើនឡើងចំពោះជនស៊ីវិលនៅតំបន់ហ្គាហ្សាស្រ្ទីប ។ 

លោកស្រី Naledi Pandor គឺជារដ្ឋមន្រ្តីទទួលបន្ទុកកិច្ចសហប្រតិបត្តិការ និងទំនាក់ទំនងអន្តរជាតិ និយាយថា ការកោះហៅឲ្យវិលត្រឡប់មកវិញនេះ គឺជារឿងធម្មតាទេ ។ 

 អាហ្វ្រិកខាងត្បូងដែលគ្មានឯកអគ្គរដ្ឋទូតនៅប្រទេសអ៊ីស្រាអែល បានគាំទ្រជាយូរមកហើយឲ្យមានសន្តិភាពនៅតំបន់មជ្ឈិមបូព៌ា ។ 

 អាហ្វ្រិកខាងត្បូង គាំទ្រជនប៉ាឡេស្ទីន ដោយប្រដូចស្ថានភាពដ៏លំបាករបស់ពួកគេទៅនឹងស្ថានភាពរើសអើងជាតិសាសន៍របស់ខ្លួន ។ 

 អំឡុងកិច្ចប្រជុំកំពូលសន្តិភាពក្រុងគែ កាលពីខែមុន ប្រធានាធិបតីអាហ្វ្រិកខាងត្បូងលោក Cyril Ramaphosa បានអំពាវនាវដល់ប្រទេសទាំងអស់ មិនត្រូវផ្តល់អាវុធដល់ភាគីណាមួយឡើយ នៅក្នុងជម្លោះតំបន់ហ្គាហ្សា ។ 

 ក្រសួងការបរទេសអាហ្វ្រិកខាងត្បូង បានជំរុញឲ្យអង្គការសហប្រជាជាតិ ដាក់ពង្រាយកងកម្លាំងរបស់ខ្លួន ដើម្បីការពារជនស៊ីវិលនៅតំបន់ហ្គាហ្សា ៕