បាត់ដំបង ៖ មន្ទីរសុខាភិបាលខេត្ត បានសម្រេចរៀបចំពង្រីកទីតាំងព្យាបាលបន្ថែមទៀត នៅតាមបណ្ដាស្រុកមួយចំនួន ជាប់ព្រំដែនជាមួយប្រទេសថៃ ខណៈមានការរកឃើញអ្នកវិជ្ជមាន ជំងឺកូវី-១៩ ចាប់តាំងពីដើមខែមិថុនានេះមក ជាបន្តបន្ទាប់ ពិសេសនៅក្នុងស្រុកកំរៀង។
ក្នុងឱកាសចុះពិនិត្យមើលទីតាំងសម្រាកព្យាបាលថ្មី នៃអ្នកជំងឺកូវីដ-១៩ លោក សឿម ប៊ុនរិទ្ធ អភិ បាលរងខេត្តបាត់ដំបង បានឱ្យដឹងថា សម្រាប់ទីតាំងព្យាបាលជំងឺកូវីដ-១៩ បន្ថែមថ្មី មានចំនួន២កន្លែង គឺ វិទ្យាល័យកំរៀង ស្ថិតនៅឃុំអូរដា ស្រុកកំរៀង និងត្រៀម១កន្លែងទៀត នៅសាលាបឋមសិក្សាសម្តេចតេជោ ហ៊ុន សែន ជ្រៃសីមា ស្ថិតនៅឃុំជ្រៃសីមា ស្រុកសំពៅលូន ។
លោក បានបន្តថា សម្រាប់អ្នកជំងឺកូវីដ-១៩ ដែលសម្រាកព្យាបាលនៅក្នុងទីតាំងបន្ថែមនេះ គឺជា អ្នកកម្រិតស្រាលប៉ុណ្ណោះ ខណៈអ្នកមានសភាពធ្ងន់ធ្ងរ នឹងត្រូវបញ្ជូនទៅព្យាបាលនៅក្នុងមន្ទីរពេទ្យបង្អែកខេត្ត។ បច្ចុប្បន្ន នៅតាមស្រុកជាប់ព្រំដែន មានអ្នកជំងឺកូវីដ-១៩ ជាង១០០នាក់ហើយ ។
លោក សុខ គឹមខុន អភិបាលស្រុកកំរៀង បានឲ្យដឹងថា នៅទីតាំងព្យាបាលអ្នកជំងឺកូវីដ-១៩ ក្នុងវិទ្យាល័យកំរៀង គិតត្រឹមថ្ងៃទី៧ ខែមិថុនា នេះ មានអ្នកជំងឺ ចំនួន១០៧នាក់ ភាគច្រើនអ្នកជាប់ពាក់ ព័ន្ធព្រឹត្តិការណ៍២០កុម្ភៈ មកពីខេត្តប៉ៃលិន ខណៈវិទ្យាល័យនេះ អាចដាក់អ្នកជំងឺកូវីដ-១៩ បានចំនួនជិត ២០០នាក់ ។
បន្ទាប់មានការរៀបចំនូវទីតាំងកន្លែងសម្រាកព្យាបាល នៃអ្នកជំងឺកូវីដ-១៩ បន្ថែមនេះ អាជ្ញាធរថៃ ក៏ បានផ្ដល់សម្ភារបរិក្ខារៈ ទប់ទល់ជំងឺកូវីដ-១៩មួយចំនួន មានដូចជា ៖ ម៉ាស់ អាវពេទ្យ អាល់កុល និងស្រោម ជើងពេទ្យ ដែលសម្ភារបរិក្ខារពេទ្យទាំងនេះ ត្រូវបានលោក សឿម ប៊ុនរិទ្ធ ប្រគល់ជូនដល់ទៅមន្ទីរពេទ្យ បង្អែកស្រុកកំរៀង ដើម្បីទុកប្រើប្រាស់ចាំបាច់នៅក្នុងអង្គភាពរបស់ខ្លួន។
ចាប់ពីមានការផ្ទុះឆ្លងជំងឺកូវីដ-១៩ នៅក្នុងប្រទេសកម្ពុជា សម្រាប់ខេត្តបាត់ដំបង មានអ្នកឆ្លង ចំនួន៤៤៣នាក់ តែត្រូវបានព្យាបាលជាសះស្បើយ ចំនួន១៦២នាក់ ស្លាប់ចំនួន២នាក់ និងកំពុងព្យាបាល ចំនួន២៧៩នាក់៕
អត្ថបទ៖ បាន សុខរិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
