ប៉ាឡេស្ទីន ៖ អ្នកតវ៉ាគាំទ្រជនជាតិប៉ាឡេស្ទីន បានប្រមូលផ្ដុំគ្នាក្នុងក្រុងតូក្យូនៅថ្ងៃអង្គារនេះ ដោយអំពាវនាវឲ្យមានបទឈប់បាញ់ក្នុងតំបន់ហ្កហ្សា នៅមុនកិច្ចប្រជុំរបស់បណ្តារដ្ឋមន្រ្ដីការបរទេសនៃក្រុមប្រទេសG7 ។

អ្នកចូលរួមជាង១០០នាក់ កំពុងកាន់បដា និងបានដើរតាមដងផ្លូវមុនការរារាំងកន្លែងដែលនគរបាលបានរក្សាសុវត្ថិភាពនៅផ្លូវកាច់ជ្រុងមួយ ដែលមានចំងាយ៥០០ម៉ែត្រពីកន្លែងដែលក្រុមរដ្ឋមន្រ្ដីកាបរទេសមកពីក្រុមប្រទេសដែលមានទ្រព្យសម្បត្ដិស្ដុកស្ដុម្ភបើកកិច្ចប្រជុំរយៈពេលពីរថ្ងៃ ដើម្បីពិភាគ្សាពីបញ្ហានានាក្នុងនោះរួមមាន សង្រ្គាមរបស់រុស្ស៊ីក្នុងប្រទេសអ៊ុយក្រែន និងវិបត្ដអ៊ីស្រាអែល-តំបន់ហ្កាហ្សាផងដែរ។

អ្នកតវ៉ាម្នាក់ឈ្មោះ អាយូមុ ឃីស៊ីដា(Ayumu Kishida) អាយុ៤៣ឆ្នាំ បាននិយាយថា អ្វីដែលខ្ញុំត្រូវការ គឺចង់ឲ្យក្រុមរដ្ឋមន្រ្ដីការបរទេសG7 បញ្ឈប់អ៊ីស្រាអែល កុំឲ្យទម្លាក់គ្រាប់បែកលើតំបន់ហ្កាហ្សា តទៅទៀត ។ពោលគឺពួកគេត្រូវតែបញ្ឈប់ជាបន្ទាន់ដោយបន្ថែមថា លោកសង្ឃឹមថា នឹងឃើញក្រុមប្រទេសG7សន្យាឲ្យមានបទឈប់បាញ់មួយក្នុងតំបន់ហ្កាហ្សា។

តាំងពីវិបត្ដអ៊ីស្រាអែល-ហ្កាហ្សា បានចាប់ផ្ដើមមក ក្រុមប្រទេសG7 បានចេញសេចក្ដីថ្លែងការរួមគ្នាមួយស្ដីពីជម្លោះ ដោយបន្ថែមខ្លឹមសារពីរបីប្រយោគទៀត។ចំណែកសមាជិកក្រុមផ្សេងទៀត បានចេញសេចក្ដីថ្លែងការដោយឡែក។ ប្រទេសជប៉ុនដែលជាប្រធានក្រុមប្រទេសG7 បានប្រើប្រាស់វិធីសាស្រ្ដដោយប្រយ័ត្នប្រយែងចំពោះវិបត្ដនេះ ដោយទប់ទល់នឹងសម្ពាធដើម្បីឲ្យស្របនឹងជំហរគាំទ្រអ៊ីស្រាអែល ដែលជាសម្ព័នមិត្ដជិតស្និទ្ធរបស់សហរដ្ឋអាមេរិកនោះ៕