ជប៉ុន ៖ រដ្ឋមន្ត្រីការបរទេសជប៉ុន លោកស្រី Yoko Kamikawa និងរដ្ឋមន្ត្រីការពារជាតិលោក Minoru Kihara បានជួបពិភាក្សាជាមួយសមភាគីអង់គ្លេសរបស់ខ្លួន នៅទីក្រុងតូក្យូ នាថ្ងៃអង្គារ (ទី៧ វិច្ឆិកា) នេះ នៅមុនកិច្ចប្រជុំរដ្ឋមន្ត្រីការបរទេសនៃក្រុមប្រទេសទាំង៧ ឬ G7 ដែលគ្រោងធ្វើឡើងក្នុងសប្តាហ៍នេះ។

សេចក្តីថ្លែងការណ៍រួមមួយ ដែលបានចេញផ្សាយ បន្ទាប់ពីកិច្ចប្រជុំ «២+២» បានអំពាវនាវឲ្យមាន «ការផ្អាកប្រយុទ្ធ ក្នុងបុព្វហេតុមនុស្សធម៌» ក្នុងជម្លោះ នៅតំបន់ហ្គាហ្សា ដែលទទួលរងការទម្លាក់គ្រាប់បែកពីសំណាក់អ៊ីស្រាអែល ដោយការធ្វើបែបនេះ គឺដើម្បីសងសឹក ចំពោះការវាយប្រហាររបស់ពួកសកម្មប្រយុទ្ធហាម៉ាសលើភាគខាងត្បូងអ៊ីស្រាអែល កាលពីថ្ងៃទី៧ ខែតុលា ដែលបានសម្លាប់មនុស្ស ១.៤០០នាក់។

បន្ទាប់ពីកិច្ចប្រជុំថ្នាក់រដ្ឋមន្ត្រីនោះ លោកស្រី Kamikawa បានរំលឹកឡើងវិញពីការអំពាវនាវនេះ នៅក្នុងសន្និសីទសារព័ត៌មាន ដោយលោកស្រីបញ្ជាក់ថា ប្រទេសជប៉ុន និងចក្រភពអង់គ្លេស បានយល់ព្រមលើតម្រូវការដើម្បីធ្វើកិច្ចសហប្រតិបត្តិការ ក្នុងការធានាឲ្យមានការផ្អាកប្រយុទ្ធបែបនេះ។

សូមបញ្ជាក់ថា មន្ត្រីសុខាភិបាល នៅតំបន់ហ្កាហ្សា បានឲ្យដឹងថា មកទល់ពេលនេះ ប្រជជនប៉ាឡេស្ទីនជាង ១០.០០០នាក់ហើយ ដែលភាគច្រើនជាស្ត្រី និងកុមារ ត្រូវបានសម្លាប់ដោយការទម្លាក់គ្រាប់បែករបស់អ៊ីស្រាអែលនេះ៕