ពលរដ្ឋភៀសខ្លួន នៃតំបន់ហ្កាហ្សា រាប់ពាន់នាក់ កំពុងជ្រកកោននៅក្រោមតង់ក្រណាត់​បណ្តោះ​អាសន្ន​ដ៏​តូចចង្អៀតក្នុងចំណតរថយន្ត អ្នកខ្លះដេកតាមច្រករបៀង ឬនៅលើដី ដោយ​ឆ្លង​កាត់​ជីវិត​ដ៏លំបាក​នៅក្រោមជណ្តើរ ហើយកំពុងប្រមូលផ្ដុំគ្នានៅគ្រប់ទីកន្លែងនៅមន្ទីរពេទ្យ អាល់ ស៊ីហ្វា (Al Shifa) ដែលជាមន្ទីរពេទ្យដ៏ធំមួយក្នុងតំបន់នេះ។

មន្ទីរពេទ្យដ៏​ធំនៅទីក្រុងហ្កាហ្សា មួយនេះ បានប្រែក្លាយទៅ​ជា​ជម្រក​ដ៏​ធំ​សម្រាប់​ប្រជាជន​ដែល​បាត់បង់​លំនៅឋានដោយសារការទម្លាក់គ្រាប់បែក ឬអ្នកដែលភ័យខ្លាច​ថា​ពួក​គេ​នឹង​ក្លាយ​ជា​ជន​រង​គ្រោះ នៅក្នុងការវាយលុករបស់យោធារបស់អ៊ីស្រាអែល លើតំបន់ ហ្កាហ្សា ស្រ្ទីប ដែល​កំពុង​ឈាន​ចូល​ដល់ខែទីពីរនៃសង្រ្គាមរបស់ខ្លួន។

កាលពីថ្ងៃអង្គារ គេឃើញមាន​ហ្វូង​មនុស្ស​ជា​ច្រើន​ដេក​នៅ​​លើ​ច្រករបៀងទាំងសងខាងមន្ទីរពេទ្យ ដោយ​បន្សល់ទុកតែកន្លែងចង្អៀតសម្រាប់ដើរ ហើយរបស់​របរ​ផ្ទាល់​ខ្លួន​របស់ជនភៀស​ខ្លួន​ទាំង​នោះ​ត្រូវ​បានទុកនៅតាមជណ្តើរ និងនៅលើបង្អួច ព្រមទាំងគំនរថង់ជាច្រើន ដែលធ្វើឲ្យទីនោះ​ប្រែក្លាយ​ជា​តូចចង្អៀតខ្លាំងដោយសារមនុស្សច្រើនលើសលប់ពេក។

សង្គ្រាមនេះ​បានបង្កឡើងដោយការវាយប្រហារថ្ងៃទី៧ តុលា របស់ក្រុមសកម្មប្រយុទ្ធហាម៉ាស លើ​អ៊ីស្រាអែល ដែលបានសម្លាប់មនុស្សជាង ១.៤០០នាក់ និងមនុស្ស ២៤០នាក់​ផ្សេងទៀត​ត្រូវបាន​ចាប់ជាចំណាប់ថ្នូរ។

ជាការឆ្លើយតប អ៊ីស្រាអែលបានបង្កើនការវាយលុកតាមផ្លូវអាកាស សមុទ្រ និងដីគោក ប្រឆាំង​នឹង​ក្រុម​ហាម៉ាស ដែលបានសម្លាប់មនុស្សជាង ១០.០០០នាក់ នៅតំបន់ឆ្នេរ​ដែលមាន​ប្រជាជន​រស់នៅ​យ៉ាងក្រាស់ក្រែល នេះបើយោងតាមក្រុមមន្ត្រីនៅក្នុងតំបន់ហ្កាហ្សា៕