អ្នកនាំពាក្យការិយាល័យមនុស្សធម៌របស់អង្គការសហប្រជាជាតិ (OCHA) លោក Jens Laerke បាន​និយាយកាលពីថ្ងៃអង្គារ (០៧ វិច្ឆិកា) ថា សេវាកម្មនានានៅតំបន់ហ្កាហ្សា ជិតដល់ «ចំណុច​ទប់​ទល់​លែងបាន» ដោយគ្មានការផ្គត់ផ្គង់ប្រេងឥន្ធនៈ ហើយរហូតមកដល់ពេលនេះ មិនមាន​រថយន្ត​ជំនួយណាមួយក្នុងចំណោមរថយន្តជំនួយចំនួន ៥៦៩គ្រឿង ដែលបានទៅ​ដល់​តំបន់​ជុំវិញ​នោះ បានដឹកប្រេងដើម្បីផ្គត់ផ្គង់នោះទេ។

កាលពីសប្តាហ៍មុន ប្រធានជំនួយរបស់អង្គការសហប្រជាជាតិ លោក Martin Griffiths បាន​និយាយ​ថា មាន «ការវិវត្តន៍ខ្លះ» ក្នុងការចរចា​ស្តីពី​ការ​អនុញ្ញាត​ឱ្យ​ប្រេង​ឥន្ធនៈ​ចូល​ទៅ​ក្នុង​តំបន់​ហ្កាហ្សា ដែលឡោមព័ទ្ធដោយអ៊ីស្រាអែល ប៉ុន្តែមិនបានបញ្ជាក់លម្អិតនោះទេ។

អ្នកនាំពាក្យ​អង្គការសុខភាពពិភពលោក លោក Christian Lindmeier បាននិយាយ​នៅ​ក្នុង​សន្និសីទ​សារព័ត៌មានខ្លីដដែលនោះ ដោយសំដៅលើការផ្គត់ផ្គង់ប្រេងឥន្ធនៈថា មូលដ្ឋាន​សង្រ្គោះ​កាន់​តែ​ច្រើន បានបិទដំណើរការ ព្រមទាំងជំនួយសង្រ្គោះជីវិតជាច្រើនក៏ជិតអស់ផងដែរ ហើយ​វេជ្ជ​បណ្ឌិត​មួយចំនួនកំពុងធ្វើប្រតិបត្តិការសង្រ្គោះដោយមិនប្រើថ្នាំស្ពឹក។

អង្គការសុខភាព​ពិភពលោកប៉ាន់ប្រមាណថា ពលរដ្ឋភៀសខ្លួនហ្កាហ្សា ជាង ១២២.០០០នាក់​កំពុង​ជ្រក​កោន​នៅក្នុងមន្ទីរពេទ្យ ព្រះវិហារ និងអគារសាធារណៈផ្សេងៗទៀតនៅទូទាំងតំបន់ ជា​មួយ​នឹង​មនុស្សប្រមាណជាង ៨២៧.០០០នាក់កំពុងស្នាក់នៅក្នុងសាលារៀន ដោយសារ​តែ​ការ​វាយ​ប្រហារ​សងសឹករបស់អ៊ីស្រាអែល ក្នុងការឆ្លើយតបទៅនឹងការវាយប្រហារកាលពីថ្ងៃទី៧ ខែ​តុលា ដោយក្រុមសកម្មប្រយុទ្ធប៉ាឡេស្ទីនហាម៉ាស ដែល​បង្ក​បាន​ជា​សង្រ្គាម​ដ៏​តាន​តឹង​រហូត​មក​ដល់​ពេល​នេះ៕